Meşa ku bi pêşengiya Meclîsa Ciwanan a DEM Partî bi dirûşmeya “Em bi civaka demokratîk ber bi azadiyê ve dimeşin” di 1’ê Nîsanê de li Amedê destpê kiribû.
Meşa ku bi wesîleya rojbûna Rêber Apo ya 76’emîn tê lidar xistin, di roja 3’yemîn de li navçeya Pirsûsê ya Rihayê didome.
Ciwanên ku li ber Rêxistina DEM Partiyê ya Pirsûsê hatin cem hev, bi berzkirina dirûşmeya “Bijî Serok Apo”, “Bê Serok Jiyan Nabe” û “Ciwan Fedaiyê Rêber Apo ne” dest bi meşê kirin.
Ciwanên ku ber bi Navenda Çandê ya Amarayê ve dest bi meşê kirin, rastî eleqeyek mezin a gel hatin.
Meşvan piştî gihiştin ber Navenda Çandê ya Amarayê ji bo 33 ciwanên ku di 20’ê Tîrmeha 2015’an de di encama êrîşa çeteyên DAÎŞ’ê de hatibûn qetilkirin, daxuyanî dan.
Ciwan beriya daxuyaniyê bi berzkirina dirûşmeyên “Şehîd Namirin” û “Ey Şehîd Xwîna te li erdê namîne” derbasî navenda çandê bûn.
Endamê Meclîsa Ciwanan a Kongreya Demokratîk a Gelan (HDK) Ozgur Garîpsaz, diyar kir ku ciwanên sosyalîst û enternasyonalîst ên hatibûn Pirsûsê, bûn hedefa komên paramîlîter.
Garîpsaz got, “Ciwanan ji bo xwedî li pergala ku bi paradîgmaya Abdullah Ocalan li Kobanê hatiye avakirin derkevin, hatibûn vir. Li ser banga Federasyona Komeleyên Ciwanên Sosyalîst (SGDF) hatibûn vir. Lê îro jî êrîşên li dijî SGDF’ê dewam dikin. Hevrêyên me li girtîgehan li dijî van êrîşan di greva birçîbûnê de ne.”
Endamê Komunên Ciwanan Dogûkan Magol, destnîşan kir ku Tirkiye bi komkujiya Pirsûsê re hewl da hevgirtina navneteweyî û pêvajoya çareseriyê provoke bike.
Magol got, “Dewlet îro jî provokasyona xwe li Tişrînê didomîne. Em ji vir bang li dewletê dikin, dev ji vê provokasyonê berdin. Weke sala 2015’an îro jî li Zap û Tişrînê têkoşîn dewam dike.”
Endama Meclîsa Dayikên Aştiyê Aynûr Yilmaz jî, anî ziman ku ciwanên ku daxwaza aştiyê dikirin bi destê çeteyan hatin qetilkirin û got divê her kes bi awayekî cidî nêzî pêvajoya aştiyê bibe.
Piştî axaftinan navê 33 ciwanên hatine qetilkirin hatin xwendin û hat gotin ku ew ‘li vir in’. Meş bi danîna qurnefîlan li cihê komkujiyê bi dawî bû.
Ciwanan piştre ji bo Festîvala 4’ê Nîsanê ber bi Xelfetiyê ve ketin rê.
