Parlamenterê berê yê Iraqê û endamê KNK’ê Mûhsîn Osman şer û agirbesta navbera Îran û DYE-Îsraîlê, bandora vê pêvajoyê li erdnîgariya Kurdan û helwesta stratejîk a ku siyaseta Kurd divê nîşan bide, nirxand. Osman ragihand ku pêvajoyên agirbestê û şer ên li Rojhilata Navîn dikarin guherînên mezin bi xwe re bînin û anî ziman ku divê Kurd di v^epêvajoyê de bi “aqlekî hevpar” tevbigere.
‘KURD JI BER TECRÛBEYA ROJAVA BI BALDARÎ TEVDIGERIN’
Mûhsîn Osman pêvajoyên Rojhilat û Rojava bi hev re nirxand û destnîşan kir ku kapasîteya hêzê û leşkerî ya hikumetên Sûriye û Îranê nikare weke hev bêne nirxandin.
Osman got, “Li Rojava Dewletên Yekbûyî yên Emerîkayê (DYE) Kurd bi tenê hişt, bi israra Tirkiyeyê destûr da operasyonan. Kurdên ku ev yek dîtin, ji ber ku baweriya xwe bi Emerîkayê nînin tevlî rageşiya li Îranê nebûn. Bi dîtina min, Kurd di vê mijarê de siyaseteke hîn aram û aqilane dimeşînin.”
Osman diyar kir ku Îran hêzeke herêmî ye, bi çekên xwe yên stratejîk dikare li qadeke berfireh bike û bi bîr xist ku Kurd tevlî şer nebû be jî li Başûr bûn hedefa Îranê.
Osman bi bîr xist ku hêzên milîs ên Îranê herêmên Kurdistanê bi îdîaya “Alîgirê Îsraîl an jî DYE’yê ye” sûcdar dikin û got, “Rastî ev nîne; lê belê Îran hem ji bo gelê xwe qanih bike hem jî çavê derdorê bitirsîne siyaseta êrişkariyê li ser herêma Kurdan dimeşîne.”
‘ROLA SIYASETA ÎXWANÎ Û OLÎ DIQEDE’
Mûhsîn Osman anî ziman ku li Rojhilata Navîn pêvajoyeke guherînê ya nû destpê kiriye, modelên ku li ser siyaseta olî û tundiyê ya li herêmê hatiye tasfiyekirin û îdîa kir ku Erebistana Siûdî bi xwe li gorî vê guherînê tevdigere.
Osman axaftina xwe bi vî rengî dewam kir, “Di vê pêvajoyê de wê êdî li Rojhilata Navîn rol ji Îxwaniyan re neyê dayin. Li şûna siyaseta olî hevsengiyên gelekî cuda têne avakirin. Îro her çend hêzên radîkal di vî şerî de têne bikaranîn jî ev jî wê weke parçeyek ji guherînê pêk were. Cihgirtina olperestên radîkal jî weke amûreke vê guherînê tê bikaranîn; lê belê ne bawer im ku paşeroj li ser wan bê avakirin.”
‘HEYETEKE REWŞENBÎRÎ YA DI SER SIYASETÊ RE ŞERT E’
Osman bal kişand ser girîngiya helwesteke hevpar a Kurdan li çar parçeyên Kurdistanê û ji bo çareserkirina pirsgirêka parçebûyî ya navbera partiyên siyasî ev pêşniyar kir: “Heyetek di ser partiyan re dikare bê avakirin. Ev desteya ji rewşenbîr û rûspiyan pêk were; dikare teorî û aqlekî hevpar biafirîne û pêşengiyê ji kongreyeke neteweyî re bike. Bi taybetî rewşenbîrên Kurd ên li dîasporayê dikarin di vê mijarê de bibin pirek.”
‘REJÎMA ÎRANÊ MAYINDE TÊ DÎTIN, DIBE KU ŞER BISEKINE’
Osman diyar kir ku li pişt perdeya pêvajoyên agirbestê yên heyî alî hewl didin destê xwe xurt bikin û anî ziman ku diyar e DYE’yê sîstema Îslamî ıya li Îranê bi rengekî qebûl kiriye. Osman ragihand ku ji ber kadroyên xwe yên îdeolojîk û avaniya dewleta kûr rejîma Îranê mayinde disekine û got, “Li şûna şerê mezin, dibe ku bazarî derkeve pêş. Îsraîl û DYE bi çekên giran lê bidin jî artêş û mîlîsên Îranê li cihê xwe ne. Ev yek wê li cihekî bisekine; dibe ku li şûna şerekî mezin hevsengiyeke bi demê re ava bibe.”
