Sê sal di ser qetilkirina Endama Navenda Lêkolînê ya Jineolojiyê Nagîhan Akarsel re derbas bûn. Bi vê boneyê Nagîhan Akarsel li cihê lê hat qetilkirin, li taxa Bextiyarî ya Silêmaniyê bi amadebûna welatparêz û jinan hat bibîranîn. Merasîma bîranînê bi deqeyeke rêzgirtina ji bo giyanê kesên di têkoşîna azadî û demokrasiyê de jiyana xwe ji dest dane dest pê kir. Piştre gul li cihê Akarsel hat qetilkirin hatin danîn û mûm hatin vêxistin. Piştre ji aliyê çalakvana siyasî Sara Rezayê ve daxuyaniyek hat xwendin.
Di daxuyaniyê de hat wiha gotin: “Berî sê salan di ruh û hestên me jinan û civakê de birînek hat vekirin. Heval û hevrêya me Nagîhan Akarsel ku çeka wê ya herî sade a ji bo parastina xwe, welat, civakê fikir û pênûsa wê bû, di demekî de ku li gel jinên Başûr hewl dida Navenda Arşiv, Lêkolîn û Pirtûkxaneya Jinên Kurd damezrîne, hat hedefgirtin û şehîd bû.”
Di dewama daxuyaniyê de wiha hat gotin: “Em bi wê çendê nesekinîne ku xemgîniya xwe bînin ziman, wê em fêrkirin ku bihevre xewnên xwe bikin rastî. Xewna gihiştina jina Kurd bi çavkaniya dîroka xwe ya bi rêya berhemên wê. Zimanê me cûdatir bû ji bersivdana wê terorê. Me bi dîroka azadîxwaziyê, bi ked û têkoşînê qurbaniyek zêde daye. Me ewqas ji dîrokê famkiriye ku bi têkoşîn, ked û israra li ser armancên xwe wî dengî bigihînin hemû cihekî.
Niha gotar û armanca Nagîhan Akarselê gihiştiye gelek cihên cîhanê. Di demekî de ku em vê rojê bibîrtinin, jinên welatên Rojhilata Navîn û Ewropayê amadekariyê ji bo nasandina pirtûka Nagîhan Akarsel dikin. Êdî em li vê cîhanê ne bi tenê ne, ne tenê çiya dost û pişta me ne. Belkî ked û têkoşîna jinan a di warê arşîv, pirtûk, lêkolîn û gotinî de xwe gihandiye hemû aliyên cîhanê.
Nasnameya jina Kurd ya azad êdî nasnameyeke ji bo cîhanê cihê şanaziyê ye. Cîhan ji me îlham û hêviyê werdigre. Nagîhan Akarselê bi xebata ku kirî, vegeriya koka nirxên civakî ku bi destên jinan hatine afirandin.”
