Piştî 3 sal û 9 meh cezayê hefsê li Hevşaredarê Bajarê Mezin ê Wanê Abdullah Zeydan hate birîn, duh li pêşiya şaredariyê çalakiya nobetê hate destpêkirin û çalakî didome. Hevseroka Giştî ya Partiya Herêmên Demokratîk (DBP) Çîgdem Kiliçgun Uçar û Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari jî tev li çalakiya li pêşiya şaredariyê bûn.
Bi tevlibûna gelek kesan li pêşiya şaredariyê daxuyanî hat dayin.
Hevşaredarê Bajarê Mezin ê Wanê Abdullah Zeydan ji ewil axivî û got: “Gelê Wanê tevî vê hewayê sar jî îradeya xwe diparêze. Yên ku êrişî îradeya gel dikin û zilmê li gel dikin ji van kiriyarên xwe şerm nakin. Yên dizî û nelirêtiyê dikin, îradeya milyonek û 200 hezar welatiyên bajar didizin û dibêjin ‘em we nas nakin.’ Bedela wê çi dibe bila bibe em ê îradeya vî gelî biparêzin. Em ê li dijî vê bêşermiyê rûmeta xwe biparêzin. Yên mafdar û demokrasiyê diparêzin, em in. Em tevek jî dizanin ku pêvajoya hatiye meşandin kompas e. DMME’yê jî di vê der barê de biryar da. Hewl didin bi rêya kompasan dîsa îradeya gel xesp bikin.”
Hevserokê DBP’a Wanê Cemal Demîr jî ev tişt anî ziman: “Vê îktîdarê, zilma xwe mîna şûrê Demokles li ser serê gelê me gerand. Me ev qebûl nekir. Di hilbijartinê de gelê me encameke baş bi dest xist. Her 14 şaredarî jî bi dest xist û AKP li vî bajarî kir partiya tabelayê. Niha dixwazin dîsa îradeya gel xesp bikin. Ev dosya, dosyayeke vala ye û îstînafê tu caran qebûl nekir. Helwesta dadgehê helwestekî siyasî ye û eleqeya xwe bi hiqûqê re nîne.”
Hevşaredara Bajarê Mezin a Amedê Serra Bucak jî ev tişt anî ziman: “Kesek nikare rûmet û kerameta xelkê Wanê jinedîtî ve bê. Pergala qeyûm pergala kompasê ye. Îktîdarê ji vê pergala qeyûm bo xwe ders negirt. Xelkê Wanê li gel îradeya xwe cih girt. Dê ev gel heta dawiyê xwedî li têkoşîna xwe derkeve. Em ê bi ser kevin û ew jî dê têk biçin. Xelkê Amedê bi gelê Wanê re ye. Wan rûmeta me ye.”
Hevseroka Giştî ya DBP’ê Çîgdem Kiliçgun Uçar jî di daxuyaniyê de wiha got: “Ev sed sal in gelê Kurd ber bi azadiyê ve dimeşe. Jin û ciwanên Wanî niha li gorî demokrasiyê tevdigerin. Di hilbijartinê de her cureyên hîleyan kirin, hilbijêr şandin lê dîsa jî xelkê Wanê derseke baş da polîtîkayên qeyûm, şer, înkar û pişaftinê yên aqilê dewletê. Emrê qeyûmekî heta hilbijartinê ye lê yê telê Kurd bi hezaran salî ye. Ma di hiqûqa vî welatî de nasnameya Kurdan heye? Hiqûqa ku em tê de cih nagirin, hiqûqa serdestan e. Tu hukmê wê biryara darazê di nezera Kurdan de tune ye. Sûcê tu hevşaredarên me nîne. Yên sûcdar, aqilê dewletê ye. Pêdivî bi peymaneke civakî ya nû û hiqûqê heye. Me du caran Wan stand lê hewl didin cara sêyemîn qeyûm tayîn bikin. Dê xelkê Wanê bersivê bide polîtîkayên neçareseriyê yê aqilê dewletê.”
Çîgdem Kiliçgun Uçar diyar kir ku girîngtirîn pirsgirêka Tirkiyeyê pirsgirêka Kurd e û wiha pê de çû: “Hûn li vî welatî rojevên cuda derxînin jî pirsgirêka sereke pirsgirêka Kurd e. We kompas kirin lê gelê Kurd dersa demokrasiyê da we. Em ê niha bi gelê Kurd û Rêberê Gelê Kurd birêz Ocalan re li ser serdema nû biaxivin. Navê serdema nû jî divê bi çareseriya demokratîk û aştiyê bê bibîranîn. Ji tu kesekî dengek dernakeve lê di 12 metrekareyên li Îmraliyê de hewldaneke mezin heye û dema wê ye ku em piştgiriyê bidin vê hewldanê. Em ji aqilê dibêje; ‘Çareseriya pirsgirêka Kurd pêkan nîne’ re dibêjin ku berxwedana gelê Kurd berxwedana neteweya demokratîk e. Gelê Kurd dê li dijî polîtîkayên şerê taybet bi paradîgmaya birêz Ocalan têbikoşe. Dawiya vê têkoşînê azadî ye.”
Hevseroka Giştî ya DEM Partiyê Tulay Hatîmogûllari jî berxwedana gelê Wanê pîroz kir û ev tişt anî ziman: “Li Turkiyeyê tu bajaran tevahiya şaredariyan ji hêla tenê yek partiyê ve nehatine bidestxistin. Lê Wanê her 14 şaredarî jî bi dest xist. Vaye tehemûla vê nakin. Kompasa ewil a li dijî Wanê hewl dan bi mazbatayê bikin. Lê hûn pir xurt xwedî li îradeya xwe derketin û ne tenê Tirkiyeyê lê hemû dinyayê dengê we bihîst. Ev, serkeftina we bû. Hevşaredarên me li dijî texrîbat û îşkenceya zîhniyeta qeyûmperest li gelê me kirî xizmet kirin û xebitîn. Destên xwe ser şaredariyên me bikişînin, em dixwazin xizmetê bikin. Rêya cezakirina birêz Zeydan vedikin. Tu hukmê vî cezayî di nezera me û qanûnan de tune ye. Ev cezaye ne tenê xespkirina vîna gelê Wanê ye, her wiha binpêkirina destûra bingehîn e. Tevî rapora pisporan ku divê tavilê beraet bihata kirin, ceza dan. Em vê qebûl nakin.”
Di berdewamê de Tulay Hatîmogûllari anî ziman ku îktîdara ku mafê bijartin û hilbijartinê ji bo Kurdan zêde dibîne peyama “Hûn nikarin Wanê birêve bibin” dide gel û wiha pê de çû: “Ev îktîdare derbeyeke siyasî dike. Niha jî rêya vê vedike. Qeyûmên heta niha derbeyên siyasî bûn. Binêrin, mîna derbeya 12’ê Îlonê bi polîs, wesayîtên zirxî, cop û hwd. dor li şaredariyê girtine. Li şaredariyên qeyûm tayîn kirine bişev mîna dizan polîs bicih kirine. Em ê li Wanê rê nedin vê. Em ê heta dawiyê bi hev re xwedî li îradeya xwe derkevin û bi hev re bi ser kevin. Encama hemû berxwedanan serkeftin e.”
Tulay Hatîmogûllari, got ku AKP hewl dide pêvajoyê tune bike û axaftina xwe wiha qedand: “Bi Îmraliyê re hevdîtin tên kirin û ji bo çareseriyeke demokratîk û aştiyane li ser pêvajoya guftûgoyê tê axaftin. Bi tayînkirina qeyûman û cezakirina hevşaredarên me hewl didin vê pêvajoyê tune bikni. Em vê qebûl nakin. Em dixwazin pêvajoya aştî û guftûgoyê bidome. Em dixwazin ev guftûgo bi aştiyê tacîdar bibe. Lê hûn bi operasyonên serê sibehê, bi cezakirina hevşaedarên me û tayînkirina qeyûman vê pêvajoyê tune dikin.
Em ê li her çar aliyên Tirkiyeyê piştgiriyê bidin Wanê. Dilê her kesî ji bo Wanê lê dide. Abdullah Zeydan, Neslîhan Şedal û hemû bijartiyên me rûmeta me ne. Ricaya me ji ew e ku li dijî hewldana xespkirina îradeyê vê meydanê vala nehêlin. Em ê li ber xwe bidin, têbikoşin û bi ser kevin.”
Piştî axaftinan, li ber stranan govend hate gerandin.
