Serokê Giştî yê Partiya Tevgera Kedê (EHP) Hakan Ozturk li ser banga ‘Aştî û Civaka Demokratîk’ a Rêber Apo ji ANF’ê re axivî û got, “Banga Ocalan bangek ji bo danîna çekan, pêkanîna aştî, civaka demokratîk û siyasetê ye. Têkildarî meseleya Kurd piştî bûyerên dîrokî û rûdanên qewimîn bangeke bi vî rengî dikarîbû bihata kirin û hate kirin.” Hakan Ozturk destnîşan kir ku divê ev yek erênî bê dîtin, di mijara çareseriya meseleya Kurd de zext û danheviyek heye û got, ev zext xurt e, xwe dispêre rastiyê, mafdar e û dikare encamê bi dest bixe.
Ozturk bal kişand ser ‘pêvajoya çareseriyê’ ya beriya niha û anî ziman ku pêşîgirtina li rijandina xwînê bi tena serê xwe divê weke rewşeke erênî bê dîtin û got, “Di atmosfera pêvajoyê de têkildarî bikaranîna Kurdî hin destketî hatin afirandin. Li gel vê yekê berxwedana Geziyê, potansiyela rêxistinbûnê ya HDP’ê û rêjeya ji sedî 13 a dengan, têkbirina hêza AKP’ê ya avakirina hikumetê bi tena serê xwe di wê pêvajoyê de pêk hatin. Zext çiqasî bê kirin û hewl bê dayin ku rê bê tengkirin jî encam wê neguhere. Pêvajoya niha jî wê encamên bi heman rengî bi xwe re bîne. Zexta ji bo daxwaza demokrasiyê ji zexta astengkirinê bilindtir e.”
AMADEKIRINA CIVAKA TIRK JI AŞTIYÊ RE
Ozturk ragihand ku gelê Tirk dikare ji pêvajoya aştiyê re amade be û got, “Bi dehan sal in propagandaya şoven li civakê tê kirin. Tiliya yekî xwîn bibe, têkoşîna lêgerîna li mafê xwe weke sedem tê nîşandan. Lewma kar wê hêsan nebe. Li gel vê yekê di dema têkoşînê de pîvana xwişk û biratiya gelan timî li jorê hate hiştin. Ev yek wê di dema bê de derfeteke mezin biafirîne. Ji xwe her carê em ê ji destpêkê ve destpê nekin, em ê hinekî ji nîvî destpê bikin. Civaka me gelek danhevî berhev kiriye. Bi van tecrûbeyan dikare pêşiya xwe bibîne. Dibêjin, destpêkirin nîvê qedandinê ye. Me destpê kir. Ziman û helwest wê ber bi demokrasiyê ve biguhere û serbest bibe. Ev yek wê gelekî bi lez pêk were. Ya zehmet her tim destpêk e. Ji qutiya girtî ronahiyê xuya kir. Bi bandora pêkanîna destpêkê em dikarin di navbera armanc û mercên demokrasiyê de têkiliyê dînin. Kar vediguhere xala polîtîk.”
SOSYALÎST JÎ JI VÊ PÊVAJOYÊ RE AMADE NÎNE
Ozturk anî ziman ku partiyên sosyalîst ên li Tirkiyyeê ji vê pêvajoyê re amade nînin, lê belê dikarin bêne amadekirin û got, “Wezîfeya vegotina meseleya Kurd, xwişk û biratiyê û aştiyê her tim li ser milê sosyalîstên Kurd bû. Divê ji bilî sosyalîstên Kurd jî vê wezîfeyê bi cih bînin. Mînak vegotina meseleyê, aştiyê, xwişk û biratiyê bû mînakên baş. Divê li ser vê yekê tevbigerin. Dawiya dawî divê em ji tevahiya civakê re vebêjin. Karê destpêkê ya ku sosyalîst bikin ew e ku baweriya xwe pê bînin ku ev mesele dikare pêk were.”
