Piştî êrîşa li herêma Pahalgamê ya Keşmîrê ya di bin kontrola Hindistanê de ye ku beriya 8 rojan 26 sivîl hatin kuştin, Pakistan hate sûcdarkirin. Pakistanê jî ev sûcdariyên Hindistanê red kir û xwest, lêpirsîneke serbixwe bê kirin.
Rageşiya li herêmê bi rawestandina têkiliyên dîplomatîk, betalkirina vîzeyan û zêdebûna liv û tevgera leşkerî ya li herêmên nêzî sînor dewam dike. Leşkerên herdu welatan li xeta sînor a li Keşmîrê 6 şev in li hev didin. Pakistanê her wiha diyra kir ku du amûrên hewayî yên bêmirov ên Hindistanê hatine xistin.
Hate ragihandin ku serokwezîrê Hindistanê Narendra Modi ‘azadiya hedefê, dem û rêbaza wê’ da artêşê. Pakistanê jî diyar kir ku wê êrîşa destpêkê nekin, lê belê bersivê bidin. Li Keşmîrê jî gel stargehan amade dike, kontrolên leşkerî zêde dibin.
Sekreterê Giştî yê Neteweyên Yekbûyî Antonio Guterres bi herdu aliyan re hevdîtin kir û bang li wan kir ku xwe ji şer vegirin. DYE, Çîn û Erebistana Siûdî jî ji bo daxistina rageşiyê danûstandinên dîplomatîk dewam dikin.
Herdu hêzên nukleerî sala 2019’an bi rageşiyeke bi heman rengî bi êrîşên hewayî li ber hev rabû bûn. Lê vê carê rîsk heye ku şerekî hîn mezin rû bide.
