Yekîtiya Xwendekarên Welatparêz ên Sûriyeyê ji bo piştgirtiya gelê Efrînê û şermezarkirina van êrîşan, li pêşiya avahiya Zanîngeha Rojava ya li taxa Hilêliyê ya bajarê Qamişlo daxuyaniyek da. Daxuyanî bi zimanê Kurdî hat xwendin.
Naveroka daxuyaniyê bi vî rengî ye:
“Di destpêkê de em weke Yekîtiya Xwendekarên Welatparêz ên Sûriyeyê êrîşên ku li ser xaka Sûriyeyê tên kirin bi tundî şermezar dikin û berxwedaniya dîrokî ya gelê me, li Heleb û Şehbayê nîşan dane silav dikin.
Armanca van êrîşan dagirkirin û parçekirina xaka Sûriyeyê û veguhertina wê ji bo navenda terora navdewletî ye.
Lewma em bang li tevahî gel û xwendekarên xwe yê Sûriyeyê dikin ku divê bizanin yek ji armancên van êrîşan ew e ku hêviyên Sûriyeyê yên jiyaneke azad û bi rûmet ji holê rakin.
Divê li tevahî Sûriyê tevahî xwendekarên Ereb, Kurd, Suryan, Aşûr û Tirkmen li dijî van êrîşên hovane destê xwe bidin hev û yekîtiya xwe xurt bikin. Parastina ax û welatê xwe, parastina rûmeta xwe ye. Li ser vê bingehê çi dibe bila bibe em ê rê nedin çeteyên dagirker ku xaka me ya buhişt ji xwe re bikin milk û bi lingên xwe yên qirêj pêli axa me bikin. Em ê bi ruhê şoreşa rojava dagirkerî, komkujî û şerê qirkirinê têk bibin.
Li gorî pêvajo û rewşa heyî, em jî weke Yekîtiya Xwendekarên Welatparêz ên Sûriyeyê seferberiyê radigihînin û tevlî qonaxa seferberiya giştî dibin. Her wiha bang li tevahî xwendekarên Sûriyeyê dikin ku bi ruhê seferberî û welatparêziyê rabin ser piya. Cihê xwe di nava şerê gel ê şoreşgerî de bigirin. Werin em bi hev re welatê xwe, rûmeta xwe û şoreşa gelan biparêzin.”
