Li gorî nûçeya Rojnews’ê ya spartî çavkaniyeke pêşmerge, îro PDK’ê hemû endamên hêzên ewlehiyê ji lîwayên hevbeş, yekîneyên girêdayî Wezareta Pêşmerge, Zêrevan û fermandariya Duhokê gazî kir û li Navenda Pêşmerge ya li Duhokê bi wan re civiya.
Pêşmergeyek ku beşdarî civînê bûyî ji Rojnews’ê re ragihand ku berpirsên lîwayê ji wan re gotine ku ew ê her kesî bişopînin û bizanin ku dê dengê xwe bidin kîjan partiya siyasî.
Heman çavkaniyê got: “Berpirsên PDK’ê ditirsin ku rêjeya dengên PDK’ê, bi taybetî di nav hêzên ewlehiyê de rêjeyek girîng de dakeve. Ji ber vê yekê ew her cûre gef û zextan bikar tînin. Ji bo pêşmerge û hêzên din ên ewlehiyê bitirsînin ku deng bidin PDK’ê.”
Hêjayî bibîrxistinê ye ku ev gef piştî wê yekê tê ku di hilbijartinên sala 2021’an de bi sedan endamên hêzên ewlehiyê, bi taybetî di lîwayên ser bi Wezareta Pêşmerge de, dengê xwe dabûn partiyên din ên siyasî. Ev jî ji ber rewşa xirab a pêşmergeyan, derengketina mûçeyan, nebûna îmtiyazên leşkerî û cudakariya di navbera pêşmergeyan de bû.
Pêşmergeyê beşdarî civînê bûyî ji Rojnews’ê destnîşan kir ti zext nikare îradeya wan bişkîne û ew bi xwe biryar didin ka dê dengê xwe bidin kîjan partî û kîjan namzetî.
Hêjayî gotinê ye ku îro saet 07:00’an de propagandaya hilbijartinê li seranserê Iraq û Herêma Kurdistanê bi dawî bû. Her wiha biryare sibe heman saet 07:00’an dengdana taybet ji bo hilbijartina Parlamentoya Iraqê were destpêkirin û di saet 18:00’an de bi dawî bibe.
Di dengdana taybet de wê milyonek 313 hezar û 980 kes dengê xwe bi kar bînin. Li Duhokê 55 hezar û 846 kes wê dengê xwe bikarbînin. Bi giştî 204 navendên dengdanê yên taybet hene, ango 958 binke bi xwe digire. Ji vane 43 navendên dengdanê û 195 binke li parêzgeha Duhokê ne.
