Endama Heyeta Îmraliyê ya Partiya Demokrasî û Wekheviyê ya Gelan (DEM Partî) û Parlamentera Wanê Pervîn Bûldan li Newoza li Wanê axivî û got, “Em vê Newrozê bi mizgîniyekê pîroz dikin. Me ev mizgînî ji Îmraliyê ji Birêz Ocalan anîn. Di rewşeke welê de ku Rojhilata Navîn veguheriye qada şer, Birêz Ocalan rêyeke nû destnîşan kir. Îro ji Wanê heta bi Edîrneyê ev ruh û pêvajo ji aliyê her kesî ve hate pejirandin, her kes xwedî lê derket. Heta ku ev pêvajo veguhere aştiyê em ê bi Birêz Ocalan re bin. Hezar silav ji Birêz Ocalan re. Banga Civaka Demokratîk wê li vî welatî gelek tiştan biguherîne. Birêz Ocalan ne îro, lê 30 sal in vê pêvajoyê ava dike. Niha firsendek heye. Pêwîstî bi wan gavan heye ku vê firsendê ji dest nede.
Em dibêjin maf, edalet, hiqûq, nasname û zimanê gelê Kurd. Divê rê nede wan kesan ku hewl didin vê sabote bikin. Em ji rêveberên vî welatî re dibêjin, em vê firsendê ji dest bernedin. Em zanin ku hin hene hewl didin vê pêvajoyê xera bikin. Operasyonên têne kirin, tayînkirina qeyûman, ev hemû sabotaj û provokasyon in. Divê em hesasiyetên hev bibînin, ji ber ku ev bihar wê cuda be.
Bila çek bêdeng bin, siyaset biaxive. Bila ewladên vî gelî nekevin binê axê. Em niha di vê astê de ne. Bangek hate kirin û divê pêwîstiyên vê yekê bêne bicihanîn. Divê herdu alî hesasiyeta hev li ber çavan bigirin, hev neêşînin û hev neşikînin. Ev pêvajo wê bibe ew pêvajo ku zarok nemirin, dayik rondikan nebarînin. Ev Newroz wê bibe Newroza aştî û azadiyê.”
