Jinan 23’emîn Meşa Şevê ya Femînîst a 8’ê Adarê bi dirûşmeya ‘Têkoşîna me ya femînîst jiyan û cîhanê diguhere’ li Kolana Siraselviler a Beyoglu pêk anîn. Tevî qedexeya Qeymeqamtiya Beyogluyê jî jin daketin kolanan û ber bi Kolana Siraselviler ve meşiyan.
Jinan bi dirûşmeyên ‘Jin, Jiyan, Azadî’ ji nokteyên cuda yên kolanê dest bi meşê kirin. Jinên li kolana Siraselvîler hatin gel hev pankarta ‘Têkoşîna me ya femînîst jiyan û cîhana me diguhere’ vekirin. Jinan dowîzên bi Kurdî, Tirkî û Îngîlîzî ku berxwedana jinan vedigotin hildan.
Jin ji Kolana Siraselvîler berbi otoparka Cîhangîr ve meşiyan. Jinên ku bi girseyî meşiyan li otoparka Cîhanar daxuyanî dan. Daxuyanî bi Kurdî, Erebî û Tirkî hat xwendin.
Ra Yavuz daxuyaniyê bi Tirkî xwend û da zanîn ku jin bi hêza ji hev digirin tên gel hev û wiha got: “Em hêza xwe ji jinên seranserê cîhanê, jinên Kurd, jinên Filistîn, Xeze, Arjantîn, Sûriye, DYA’yê digirin û dengên xwe didin dengê wan. Em li dijî cîhana ku hewl tê dayîn bi şer bê avakirin serî hildidin.”
Ra Yavuz di berdewamiya daxuyaniyê de daxuyakirin ku yên ji têkoşîn, jiyan û berxwedana wan ditirsin, êrîşan zêdetir dikin û wiha vegot: “Rojekê peymana Stenbolê fesh dikin roja din ‘sala malbatê’ îlan dikin. Hewl didin jiyana jinan teng bikin. Dixwazin me tune bikin. Lê em dibêjin ku em bêdeng namînin. Em heta jiyana azad bi dest nexînin em naçin tu derekê. Em hesabê sedsalan dipirsin. Em di cîhaneke wekhev, bêyî tundî û azad de israr dikin. Heta jiyanek wekhev û azad neyê avakirin em naçin tu cihekî.”
Piştî daxuyaniyê çalakî bi dirûşmeyên ‘Jin, Jiyan, Azadî’ bidawî bû.
