Wezareta Edaletê ya Dewletên Yekbûyî yên Emerîkayê (DYE) zêdeyî 3 milyon belge, zêdeyî 2 hezar vîdeo û 180 hezar wêne parve kirin. Evane têkildarî tora zayendî û fînansal a li dora Jeffrey Epstein ê ku hatibû ragihandin sala 2019’an li girtîgehê miriye, şêwe girtine. Di nava peywendiyên vê tora fûhûş û tundiya zayendî de, ji Serokê DYE’yê Donald Trump heya birayê Qralê Îngilistanê, ji Elon Musk heya Bill Gates, heya Bill Clinton gelek kes cih digirin.
Di vê torê de bi şantaja zayendî û tundiyê re her cure pere di nava hev de derbas dibin. Xwesteka kesên li navenda kapîtalîzma krîmînal her tiştê ji xwe re rewa dibînin, ji bo hîn zêdetir dewlemendbûnê, kontrol kirinê û rêvebirinê derdikeve pêş. Superstar, milyarderan, bankavan, dîplomat, elîtên teknolojiyê û kesên ji ber fûhûşa zarokan hatine mehkûmkirin, xelekên cuda yên heman çêkerê çêdikin.
XETA EPSTEIN A LI ROJHILATA NAVÎN: ÎMARATÊN EREB A YEKGIRTÎ, SIÛDÎ EREBISTAN, QATAR
Gelo kîjan peywendiyên bi welatên Kendavê re derdikeve pêş?
Belgeyên dadgehê yên nû yên ku Sibata 2026’an ji raya giştî re hatin eşkerekirin, peywendiyên kûr ên ku Jeffrey Epstein bi elîtên Kendavê re çêkiriye derxist holê. Li gorî dosyayan Epstein bi taybetî bi kesên xwedî hêz ên li Îmaratên Ereb a Yekgirtî û Siûdî Erebistanê re peywendiyên fînansal û şexsî pêş xistiye û navbeynkarî ji razemeniyên di asta bilind de û peywendiyên siyasî re kiriye.
Di belgeyan de yek ji kesên derketiye pêş, CEO’yê Dubai Ports World (DP World) Sultan Ahmed bin Sulayem e. Tê dîtin ku Epstein û Sulayem ji sala 2007’an ve bi rengekî rêkûpêk bi hev re peywendî çêkirine.
Li gorî dosyayan, Epstein navbera Sulayem û Serokwezîrê berê yê Îsraîlê Ehud Barak hevdîtin dane çêkirine; ev peywendî armanc dikirin ku bi salan beriya Peymanên Îbrahîm ên 2020’an, berê sermayeya Îmaratê bide şîrketên Îsraîlê.
Li gorî belgeyan, Sultan Ahmed bin Sulayem serdana girava taybet a Epstein a li Karîbîkan kiriye û sala 2016’an giravek kirî ye. Di e-postayên her duyan de peyamên zayendî û bazariyên li ser jinan hatine kirin, bal dikêşin.
SIÛDÎ EREBISTAN Û PRENS
Peywendiyên Epstein ên bi Prensê Siûdî Erebistanê Muhammed bin Selman (MBS) re jî di dosyayan de cih girt. Di nivîsên salên 2016-2017’an de MBS diyariyên luks ji Epstein re şandine, her wiha rasterast bi yek ji şêwirmendên nêzî qesra qraliyeta Siûdiyê Raafat Al-Sabbagh re peywendî çêkirine.
PARÇEYÊN RÛBERÊ KABE’YÊ HATIN VEGUHEZTINA FLORÎDAYÊ
Yek ji hûrgûliyên herî balkêş a di belgeyan de ew e ku sala 2017’an ji rûberê pîroz ê ku Kabe’yê dinixumîne (Kîsve) sê parçe ji Siûdî Erebistanê ji bo cihê Epstein ê li Floridayê hate veguhestin. Tê diyarkirin ku ev pêvajo bi rêya kesên têkiliya wan bi Îmaratê re heyî û karmenda ji Îmaratê Azîza Al-Ahmadî hatin organîzekirin.
QATAR Û BAZIRGANÊN BERÊ YÊN ÇEKAN
Li gorî belgeyan, Epstein sala 2018’an navbera Ehud Barak û serokwezîrê berê yê Qatarê Hamad bin Jassim bin Jaber al-Thani hevdîtinek veşartî daye pêkanîn.
Her wiha di dosyayan de hate piştrastkirin ku salên 1980’an Epstein bi bazirganê çekan ê Siûdiyê yê navber Adnan Kaşikçi re jî di nava peywendiyê de bû.
