Partiya Îslamiya Kurdistan (PÎK) têkildarî êrîşên çeteyên hikûmeta demkî ya Sûriyeyê ku dewleta Tirk a dagirker piştgiriya wan dike de daxuyaniyeke nivîskî weşand. PÎK’ê bang kir ku li dijî êrîşên çeteyan rabin ser piyan û ev tişt parve kir:
“Gelê Kurd îro roja xîret û berxwedanê ye. Her Kurd li ser wan ferz e ku ji bo gelê me yê Rojava li hember çeteyên HTŞ-DAÎŞ’ê û çeteyên dewleta Tirk a dagirker rabin ser piyan. Ereb û Tirk bi hev re şerekî kirêt li hember gelê me didin meşandin. Divê em bi ruhê niştimanî piştgiriya gelê xwe yê Rojava bikin.
Dema li Rojava bajar dihatin rûxandin û gelê Kurd bi tenê li dijî DAIŞ’ê şer dikir, hemû gelên herêmê bi canê xwe tekoşîn dan.
Îro jî eşîrên Ereb bi çeteyên HTS û DAÎŞ’ê re rê li hember gelê Kurd digirin û şer dikin.
Hemû dinya bêdeng e li hember qetlîamên ku li dijî gelê me tên meşandin.
Divê Dewletên Yekbûyî yên Emerîkayê, welatên Ewropayê û hemû dewletên cîhanê bi lezgînî li dijî HTŞ û çeteyên di bin kontrola Tirkiyeyê de helwesteke zelal bigirin.
Divê Neteweyên Yekbûyî berpirsiyariya xwe ya li dijî van êrîş û qetlîaman li ser gelê Kurd ê bindest bicîh bîne û bi lezgînî mudaxele bike.
Werin em li her derê bi ruhê neteweyî destkeftiyên gelê xwe yê li Rojava li dijî êrîşên dewleta çete ya Sûriyeyê û dewleta Tirk a dagirker biparêzin. Ev têkoşîn ji bo hebûn û rûmeta me pêwîstiyek e!
Em wek PÎK – Partiya Îslamiya Kurdistan li ba gelê Kurdê Rojava ne û em amade ne li her deverê helwesta xwe ragihînin.
Dubarê bangewaziya me ji bo hemû hêz û partiyên Kurdan ew e ku bi yek dengî û bi ruhê neteweyî helwesteke zelal nîşan bidin.”
