PÎK’ê Qazî Mihemed û hevalên wî bi bîr anî

Bi navê Partiya Îslamî ya Kurdistanê (PÎK) Serokê Giştî Hîkmet Serbilind ji ber salvegera 78’an a darvekirina Serokê Komara Mahabadê Qazî Mihemed û hevalên wî daxuyaniyek da.

Di daxuyaniyê de hate bibîrxistin ku di 31’ê Adara 1947’an de serokê Komara Kurdistanê ya Mahabadê Qazî Mihemed û hevalên wî ji aliyê desthilatdariya Îranê ve hatin darvekirin û hate ragihandin ku ew Qazî Mihemed û hevalên wî ji bîr nakin.

Daxuyaniyê bi vî rengî dewam kir:

“Wekî Şehîd Qazî Mihemed gotî: Ey milletê min ê mazlum! Dijminiya hevdu nekin, pişta xwe bidin hevdu, li dijî dijminên xwe yê zalim têkoşîn bikin û xwe bi erzanî nefiroşin dijminê xwe.

Hemû Rêberê kurdan bi qelleşî ji terefê dijminan ve hatin qetilkirin. Azadiya her miletî bi yekitî, tifaq û hevkariyê çê dibe.

Hêvîdarim gelê Kurd ti carî bi ti îdeolojî û baweriya dijminê xwe neyên xapandin!

Em 78’mîn saliya kuştina lîder û Rêberê gelê Kurd Pêşewa Qazî Mihemed û hevalên wî û hemu Şehîdên Kurdistanê bi dilekî germ û bi hurmet bi bîr tînin.

Hemû Şehîdên Kurdistanê serbilindî û serfiraziya me ne. Cîhê wan cennet be înşallah.”