Di dîrokê de gelê Kurd hertim rastî qirkirin û tinekirinê hatiye. Li Rojavayê Kurdistanê jî ev qirkirin hate meşandin. Dagirkerên Kurdistanê hewl dan ku gelên Kurdistanê ji çand, ziman û dîrokê dûr bixin. Bi Şoreşa Rojavayê Kurdistanê ya ku bi şoreşa jinê û guhertina hişmendiya yekparêziyê tê nasîn re gel xwedî li çand, ziman û dîroka xwe derketin. Li herêmên Bakur û Rojhilatê Sûriyeyê careke din pirtûkên Kurdî refên pirtûkxaneyan xemilandin û bi ked û derfetên kêm û zehmetiyên heyî re çanda xwendinê tê pêşxistin. Îro li herêm û bajarên Rojavayê Kurdistanê dema ku mirov li kolanan dimeşe çavên wan li pirtûkxaneyan dikevin. Yek ji wan jî Pirtûkxaneya Şilêr e ku rojane hejmarekî mezin xwendevanan dihewîne.
Yekîtiya Nivîskarên Wêjeyî yên Bakur û Rojhilatê Sûriyeyê di 4’ê Îlona 2025’an de li bajarê Qamîşloyê yê kantona Cîzrê Pirtûkxane û Cafeya Şilêr vekir.
NAVENDA ÇANDÎ BI 7,500 PIRTÛKXANEYAN
Pirtûkxaneya Şîlêr 7,500 pirtûkên bi zimanên cuda hatine weşandin, di nav wan de berhemên Rêber Apo jî hene.
Ji van 765 bi Kurdî, 70 bi Zimanên Biyanî û 7 hezar û 95 jî bi Erebî ne. Pirtûk di gelek kategoriyan de ji bo xwendevanan peyda dibin, di nav de yên zarokan, roman, çîrokên kurt, dîrok, folklor, helbest, lêkolînên jinan, huner, siyaset, felsefe, psîkolojî, hiqûq, civaknasî, zanist û bijîşkî hene.
Weşanxaneya Şilêr 870 pirtûk bi zimanên Kurdî, Erebî û Tirkî çap kirine.
‘PIRTÛKÊN GELEK ZIMANAN LI PIRTÛKXANEYÊ TÊ PEYDAKIRIN’
Rêvebera Pirtûkxane û Cafeya Şilêr Fîdan Mihemed li ser avakirina Pirtûkxaneya Şilêr ji ANF’ê re axivî. Fîdan Muhemed diyar kir ku ev demeke dirêj e li ser xebat tê kirin û wiha got, ‘’Pirtûkxaneya Şilêr di 4’ê Îlonê de hate vekirin, nêzî 6 mehan amadekarî jê re dihate kirin. Pirtûkên gelek zimanan li pirtûkxaneyê tên peydakirin. Pirtûkxane cihek ji bo bêdengiyê ye ku mirov li ser xwendin û komkirina agahiyan hûr bibe. Her wiha li kêleka pirtûkxaneyê me Cafeya Şilêr avakiriye, ew jî girêdayî pirtûkxaneyê ye. Piştî ku xwendevan xwendina xwe bi dawî dikin derbasî cafeyê dibin û li ser pirtûka ku xwendine nîqaşan dikin. Her wiha çalakiyên rewşenbîrî jî tên lidarxistin.”
ARMANC ÇANDA XWENDINÊ BELAV BIKIN
Fîdan Mihemed di berdewamiya axaftina xwe de qala armanca vekirina pirtûkxaneyê kir û wiha pêde çû: ‘’Armanca me ya sereke ya avakirina pirtûkxaneyê ew e ku em çanda xwendinê di nav civak û bi taybet nav ciwanan de belav bikin. Her wiha wate û girîngiya xwendinê em rast şîrove bikin û bighînin civakê. Ji bo wê jî ne tenê ciwan û xwendekar berê xwe didin vir, her beşê civakê berê xwe didin
pirtûkxaneyê û cafeyê.”
LI PIRTÛKXANEYÊ QUNCIKÊ ZAROKAN JÎ HEYE
Di nav axaftina xwe de Fîdan bal kişand ser beşa zarokan û wiha domand: ‘’Di pirtûkxaneyê de quncikê zarokan jî heye, di wê qûncikê de tenê pirtûk û çîrok ên girêdayî zarokan tê de heye. Gelek mamoste jî berê xwe didin pirtûkxaneyê dixwazin ji xwendekarên xwe re pirtûk û çîrokan bigirin.”
HEMÛ ÇAND LI PIRTÛKXANEYÊ KOM DIBIN Û ÇANDA HEV NAS DIKIN
Fîdan Mihemed anî ziman ku gelek kes berê xwe didin pirtûkxaneyê û wiha dawî li axaftina xwe anî: “Ruxmê ku Pirtûkxane û Cafeya Şilêr nû hatiye vekirin, lê dîsa hejmarek
mezin ji gel, xwendekar, nivîskar, rewşenbîr û mamoste û zarok û hemû beşên civakê tên pirtûkxaneyê. Di dema ku me amadekarî dikir de hejmarek mezin ji xwedekaran berê xwe didan me, pirtûkxaneyê bala wan pir dikişand. Di Pirtûkxane û Cafeya Şilêr de hemû çand kom dibin û çandên hev nas dikin.”
