Ji 27’ê Mijdara 1978’an dema damezrandina PKK’ê û vir ve gelê Kurd têkoşîneke mezin meşand. Berxwedana 47 salan ku gelek lehengan tê de cih girtin îro ji bo hemû gelên cîhanê re bûye hêvî. Gerîlayênw HPG û YJA Starê bi wesîleya salvegera 47’an a damezrandina PKK’ê ji ANF’ê re axivîn.
Gerîlaya YJA Starê Zîlan Kobanê anî ziman ku ew didin ser şopa bi hezaran hevrêyên xwe yên ku di têkoşîna azadiyê ya Kurdistanê de berdêl dan, xwedî li mîrateya wan a berxwedanê derdikevin û got, “Di salên destpêkê yên têkoşînê de Rêber Apo, Hakî Karer, Kemal Pîr û hevala Sar hebûn. Ji destpêka têkoşînê û vir ve berdêlên giran hatin dayin. Berxwedana Tevgera Azadiyê ku bi keda mezin a gel, Rêbertî û şehîdan mezin bû, îro ji aliyê tevahiya cîhanê ve tê zanîn.
Bi banga Rêbertî re em êdî derbasî nava pêvajoyeke nû bûn. Ya ku ji me tê xwestin ew e ku di çarçoveya paradîgmaya Rêber Apo de li ser bingeha Neteweya Demokratîk xwe bi rêxistin bikin. Ruhê demê ev e. Em neçar in jiyana azad ava bikin û di vê oxirê de têbikoşin. Divê em xwe hîn bêhtir bi rêxistin bikin, jiyana wekhev û komunal di vê çarçoveyê de ava bikin. Jin îro hem li qada leşkerî hem jî li qada îdeolojîk pêşengiyê ji jiyanê re dikin. Weke gerîlayên YJA Starê ji bo jiyaneke azad em ê heta dawiyê têbikoşin.”
Gerîla Delîl Tey ê bi eslê xwe ji gelê Ereb hestên xwe li ser salvegera damezrandina PKK’ê bi vî rengî anî ziman: “Salvegera damezrandina PKK’ê destpêkê li Rêber Apo, şehîdên şoreşê û gelê me pîroz be. Ev têkoşîna bi salan gelekî zor û zehmet derbas bû. Bi komeke biçûk destpê kir, îro gihîştiye bi milyonan. Berê hebûna Kurdan nedihat naskirin; niha bi saya Rêber Apo Kurd têne naskirin û ji bo azadiya xwe têdikoşin. PKK ne tenê ji bo gelê Kurd her wiha ji bo hemû gelan têdikoşe. Ji bo gelê Ereb, gelê Asûrî-Suryanî, ji bo azadiya hemû gelan li ber xwe dide. Em dixwazin fikrên Rêber Apo li Rojhilata Navîn belav bikin, bi vî rengî civak karibin xwe bi awayekî azad bi rê ve bibin. Weke ciwanekî Ereb tevlî nava tevgerê bûm; ji bo azadiya gelan tevlî bûm. Bi bandora şehadeta hevalên Mahîr û Delîl tevlî bûm. Dixwazim xewn û xeyalên wan pêk bînim. PKK hate fesixkirin, lê belê em ê xwedî li mîrateya wê derkevin û li ser vê bingehê têkoşîna xwe dewam bikin.”
