Siyasetmedar Lezgîn Botan biryara hevdîtina heyeteke ji kesên ‘’Komîsyona Çareseriyê’’ ya bi Rêber Apo re ya li Girava Îmraliyê ji ANF’ê re nirxand û diyar kir ku komîsyonê piştî nîqaşên dûr û dirêj bi piraniyeke mezin ev biryar daye û ji aliyê pêşketina pêvajoya çareseriyê ya li gel rê û rêbazên rewa ve weke pêngaveke girîng tê dîtin.
Botan têkildarî girîngtirîn encama biryarê ev yek anîn ziman: ‘’Piştî ku ev hevdîtin pêk hat, dewleta Tirk ku yek ji aliyan e, di esasê xwe de cara ewil bi awayekî fermî muxatabekî meseleyê, Birêz Abdullah Ocalan weke muxatabê fermî qebûl kiriye û statuya wî teslîm kiriye. Ev yek jî ji aliyê hêsankirina çareseriyê û birêvebirina pêvajoyê ve gelekî girîng e.’’
Her wiha Lezgîn Botan anî ziman ku ev pêngav têkildarî jiholêrakirina bêbaweriya di nava civakê de û daxilkirina mekanîzmayên razîbûnê ya bi awayekî çalaktir xwedan potansiyeleke girîng e.
Legîn Botan di dewama axaftina xwe de biryara CHP’ê ya neşandina endamên xwe ya ji Girava Îmraliyê rexne kir û diyar kir ku ev helwest kêmasiyeke mezin e û anî ziman ku CHP di vê pêvajoyê de dixwaze ku ‘bi awayekî veşartî hevdîtinan pêk bîne.’
Lezgîn Botan piştre hişyariya; ‘’Di gel ku sicîla CHP’ê di pirsgirêka Kurd de xirab e jî, diviyabû ku CHP’ê hem ji bo rûbirûbûna li gel xwe hem jî ji bo ku weke aktoreke aligirê aşitiyê were naskirin ev pêvajo weke derfeteke dîrokî bidîta. Guhdayîna hin derdorên diyar ên netewperest û xwejêkêmhiştina vê rola dîrokî, wê weke zehmetiyeke mezin vegere li pêşiya wê’’ da.
‘SERERASTKIRINÊN HIQÛQÎ WÊ TEQEZ BIKEVIN ROJEVA MECLÎSÊ’
Lezgîn Botan diyar kir ku wê hevdîtin bêyî CHP’ê berdewam bikin û statuya muxatabiya fermî ya Rêber Apo bi awayekî fermî pêk were û destnîşankir ku piştî vê biryarê daxwaza civakî ya têkildarî aşitiyê xurt bibe û divê aliyê demokratîk ê di nava CHP’ê de jî van nerazîbûnan li ber çavan bigire.
Lezgîn Botan xweşbîniyên xwe yên têkildarî pêvajoyê anîn ziman û got:
‘’Civakîbûna pêvajoyê, wê li gel biryara şandina heyetê ya ji bo Girava Îmraliyê leztir pêk were û ez di wê baweriyê de me ku ji niha û şûnde wê êdî sererastkirinên hiqûqî bi awayekî teqez bikevin rojeva Meclîsê. Pêşketina pêvajoyên civakî ya bi awayekî giran, wê teqez rewşeke asayî bi dest bixe.’’
