Pêvajoya çareseriyê di rojevê de ye. Komîsyona ku têkildarî pêvajoyê li meclîsê ava bû, dest bi karên xwe kir. Yek ji daxwazên herî mezin ê ji bo rakirina astengiyên li pêşiya çareseriya pirsgirêka Kurd a bi rêbazên demokratîk, berdana girtiyên nexweş e.
Hevseroka Federasyona Komeleyên Piştevaniya Hiqûqî ya bi Malbatên Girtî û Hikumxwaran re ya Med (MED TUHAD-FED) Pinar Sakik Tekîn li ser rewşa girtiyên nexweş û binpêkirinên li girtîgehan ji ANF’ê re axivî.
Pinar Sakik Tekîn got, “Di pêvajoya nû de ku bi banga Birêz Abdullah Ocalan a 27’ê Sibatê destpê kir, heta niha gelek gavên girîng hatin avêtin. Ev pêvajo bêguman gelekî girîng û hêja ye. Pêvajoyeke ku pêwîstiya civakê û gelan bi aştiyê heye.
‘LI GIRTÎGEHAN BINPÊKIRINÊN MAFÊN MIROVAN HER ROJ ZÊDE DIBIN’
Dema ku mirov bala xwe didin ser girtîgehan mixabin rewşeke berevajî vê dibînin. Li girtîgehan binpêkirinên mafên mirovan dewam dikin. Li derve pêvajoyek hebe divê bandora xwe li girtîgehan jî bike. Çawa ku şer di navbera aliyan de tê kirin, aştî jî divê di navbera aliyan de be. Pêvajoya aştiyê ne ew pêvajo ye ku bi gavên yekalî bimeşe. Divê herdu alî gavên şênber biavêjin.
Çawa ku Kurd û nûnerên wan bi navê aştiyê wezîfeyên xwe bi cih tînin, dewlet jî divê bi rengekî cidî gavê biavêje. Mixabin girtîgeh gelekî dûrî aştiyê ye. Binpêkirinên mafên mirovan her roj zêde dibin. Rewşa girtiyên nexweş li gel ku gelekî giran e nayên berdan û nikarin ji şert û mercên têrker ên tenduristiyê sûdê werbigirin. Li girtîgehan bi sedan girtiyên nexweş hene; piraniya wan nikarin bi tena serê xwe jiyana xwe dewam bikin û ji gelek mafan bêpar têne hiştin.
Em dibêjin, divê dewlet gava destpêkê di mijara girtiyên nexweş de biavêje. Divê daxwazên girtiyên nexweş li ber çavan bêne girtin.”
‘GIRTIYÊN NEXWEŞ DIVÊ TAVILÊ BÊNE BERDAN’
Pinar Sakik Tekîn bal kişand ser komîsyona li meclîsê têkildarî pêvajoyê hatiye avakirin û got, “Em dikarin bibêjin ku gava destpêkê ya aştiya civakî wê ji vir destpê bike. Bendewariyên me ji vê komîsyonê gelekî zêde ne. Yek ji mijarên sereke ku divê li komîsyonê bê axaftin binpêkirina mafên mirovan ên li girtîgehan e. Girtiyên nexweş divê tavilê bêne berdan. Komîsyon di vê mijarê de divê tavilê kar bike. Hemû alî divê gavên şênber biavêjin û bi lez bigihêjin aştiyê. Hîmê destpêkê yê aştiyê divê li girtîgehê bê danîn.”
