Gelê li gundên Başûrê Kurdistanê yên ku rojê bes 2-3 saet ceyran tê dayîn, li hemberî qutkirina ceyranê ya demdirêj nerazîbûnên xwe nîşan da.
Hate ragihandin ku di xwepêşandanên li navçeya Wartê ya Hewlêrê de hêzên aşayîşê yên girêdayî PDK’ê gule berdane ser gel û di encamê de welatiyekî bi navê Hasan Rahman jiyana xwe ji dest daye. Hate diyarkirin ku 4 welatî jî birîndar bûne.
Ji ber heman sedemê li gundên navçeya Xebat a girêdayî Hewlêrê jî protesto hatine lidarxistin. Her wiha duh bi şev li Balisanê gel li hemberî birîna ceyranê daket qadan rêya çûnûhatinê girt.
GELO PROJEYA CEYRANA NAYÊ QUTKIRIN HÎLEDAR E?
Rayedarên Herêma Kurdistanê hefteya borî îdîa kiribûn ku zêdetirî ji sedî 30’ê herêmê êdî 24 saetan ji ceyranê sûd werdigire. Lê belê li gelek herêman hê jî ceyran bi demên dirêj qut dibin û welatî neçar dimînin ku jeneratorên taybet bi kar bînin.
Li gorî îdîayan projeya ‘ceyrana 24 saetan a bênavber’’ ya ji aliyê Hikûmeta Herêmî ya Kurdistanê ve hatiye destpêkirin, ji bo ku li navendên bajaran were sepandin ceyrana herêmên bejahî tê qutkirin. Ev yek weke binpêkirina mafê sereke yê enerjiyê yê gelê li bejahiyê tê pênasekirin.
Li gorî nûçeya RojNewsê endamê Parlamentoya Kurdistanê Ali Heme Salih di daxuyaniya xwe ya têkildarî projeyê de aniye ziman ku ji bo dabînkirina çavkaniya ji projeya ceyrana 24 saeetan ya bênavber rojê bes 2-3 saetan ceyran ji gundan re tê dayîn û ceyrana ku bi projeyê tê firotin ji 7 -10 qatî ji ya normal buhatir e.
DIBE KU PROTESTO BELAV BIBIN
Welatiyên li herêmên bejahî anî ziman ku ew vê neheqiyê qebûl nakin û hişyarî dan dibe ku protesto li herêmên din jî werin lidarxistin. Ji ber birîna ceyranê şert û mercên jiyanê her ku diçe zehmettir dibin û polîtîkayên hikûmetêyên enerjiyê ji aliyê gel ve bi tundî tên rexnekirin.
