Navenda Ragihandinê ya Hêzên Sûriya Demokratîk (QSD) der barê êrîşên çekdarên hikumeta veguhêz a Sûriyeyê li dijî bajarê Dêr Hafirê de daxuyaniyek weşand.
Daxuyanî bi vî rengî ye: “Çekdarên hikumeta veguhêz a Sûriyeyê êrîş û binpêkirinên xwe yên li dijî herêmên Bakur û Rojhilatê Sûriyeyê didomînin. Di wan êrîşan de, şervanên me û şênî dikin hedef. Ew bi van êrîşan dixwazin ewlehiya herêmê têk bibin.
Vê sibê, balafireke xwekuj a girêdayî çekdaran, erebeyeke leşkerî li dora Dêr Hafirê bombebaran kir. Di encamê de 3 şervanên me birîndar bûn. Vê êvarê jî balafireke bêmirov a wan dîsa dewriyeyeke Hêzên Ewlekariya Hundirîn bombebaran kir û di encamê de 4 şervanên me birîndar bûn.
Niştecih bê serûber tên topbarankirin. Ev jî jiyana sivîlan rasterast dixe xetereyê û dixwazin bi van êrîşan şêniyan bitirsînin.
Çekdarên hikumeta veguhêz a Sûriyeyê 20`ê Îlonê li Dêr Hafirê komkujiyek kiribûn ku di encamê de 8 sivîl şehîd bûn. Di nav wan de zarok hebûn.
Ev êrîşên dubare, hewldanên çekdarên hikumeta veguhêz a Sûriyeyê di têkbirina ewlehiya herêmê û derxistina tevliheviyê de, eşkere dikin. Lê em careke din destnîşan dikin ku em ê erka xwe ji bo parastina gelê herêmê ji hewldanên têkbirina ewlehiya herêmê, bidomînin.”
