Rêvebera Şaxê Sêrtê ya ÎHD’ê Nazahat Celen di civîna çapemeniyê de ragihand ku rêveberiya girtîgehê li hemberî peymanên navneteweyî û Destûra Bingehîn tevdigere.
Di raporê de hate gotin, girtiyê nexweş Mehmet Emîn Çam ê 73 salî aliyê xwe yê çepê felç bûye, li girtîgehê 2 caran krîza dil derbas kir, rojê nêzî 20 dermanan dixwe û li gel vê yekê jî Saziya Tipa Edlî rapora ‘Dikare li girtîgehê bimîne’ daye.
Her wiha hate gotin, Tahîr Atak ê 84 salî di rewşeke welê de ye ku nikare pêwîstiyên xwe yên bingehîn bi cih bîne.
Di raporê de hate gotin, girtî nikarin bi têrkerî sûdê ji xizmetên tenduristiyê werbigirin.
Nezahat Celen anî ziman ku guhertinên di qanûna înfazê de hatin kirin çareserî ji rewşa girtiyên nexweş û extiyar re peyda nekir û bi biryarên kêfî yên Saziyên Çavdêrî û Îdareyê yên Girtîgehê berdana bi şert bi salan tê taloqkirin.
