Endamê Komîteya Akademiya Rêber Apo ya Fikir û Zanistiyê Mesûd Bozî ji ANF’ê re qala tecrîda li ser Rêber Ocalan, banga ‘Aştî û Civaka Demokratîk’ û fikrên wî yên ji bo çareseriya krîzên li Rojhilata Navîn kir.
Di destpêka axaftina xwe de Mesûd Bozî bi bîr xist ku Rêber Apo zêdeyî 26 sal in li zindana Îmraliyê dîlgirtî ye û dewletên desthilatdar bi rêya tecrîdê hewl didin pêşî li belavbûna fikrê wî bigirin.
Mesûd Bozî işaret bi aloziya li Rojhilata Navîn kir û anî ziman ku pêşîgirtina li vê aloziyê bi azadiya fîzîkî ya Rêber Apo dibe.
Di vê mijarê de Mesûd Bozî destnîşan kir ku di nava guherînên heyî yên li herêmê de dewleta Tirk tengav bûye û got, “Dewleta Tirk di nava vê aloziyê de xeniqî ye. Ev desthilatdarî bi fikir û felsefeya Rêber Apo dikare ji holê bê rakirin.”
Endamê Komîteya Akademiya Rêber Apo ya Fikir û Zanistiyê Mesûd Bozî diyar kir ku Rêber Apo bi bangekê rewşa siyasî ya li herêmê bi temamî guhert û got, “Bi banga ‘Aştî û Civaka Demokratîk’ re hêviya aştiyê li tevahiya herêmê belav bû. Tenê bi rêya aştiyê dawî li aloziyên li Rojhilata Navîn dikare bê anîn.”
