Bi boneya salvegera 13’emîn a Şoreşa 19’ê Tîrmehê Rêveberiya Xweseriya Demokratîk a Herêma Bakur û Rojhilatê Sûriyeyê daxuyaniyek da. Di daxuyaniyê de Rêveberiya Xweser salvegera 13’emîn a Şoreşa 19’ê Tîrmehê li gelên herêmê pîroz kir û biryardariya xwe ya ji bo avakirina Sûriyeya nenavnedî ya demokratîk û pirreng dubare kir.
Daxuyanî wiha ye:
“Bi vê boneya dîrokîya mezin, salvegera 13`emîn a destpêkirina Şoreşa 19`ê Tîrmehê Rêveberiya Xweseriya Demokratîk a Herêma Bakur û Rojhilatê Sûriyê pîrozbahiyên xwe yên germ li gelê me dike.
Ev şoreş di kêliyek girîng a dîroka Sûriyeyê de pêk hat. Ji ber ku welat di nav çerxek tundî û zordariyê de bû. Îradeya gelên Bakur û Rojhilatê Sûriyê destpê kir û nîşaneyên projeyek demokratîk, piralî û nenavendî li ser bingeha îradeya gel xêz kir.
Girîngiya Şoreşa 19`ê Tîrmehê ne tenê bi herêmê ve sînordare lê belê ji wê zêdetir bûye nimûneke pêşeng ku dikare ji bo çareserkirina tevahiya aloziyê Sûriyê were pêk anîn. Gelê me bi hemû pêkhateyên xwe di hevgirtin û yekîtiyê de bi ser ket, qurbaniyên mezin pêşkêş kir û di serî de bi hezaran şehîdên ku canê xwe ji bo parastina ax û gelê xwe feda kir û rûmeta mirovahiyê li hember terorîzm û zordariyê parastin. Em îro wan bi rêzdarî û dilsozî bi bîr tînin û em soza xwe ji bo şopandina rêya wan heta pêkanîna hemû armancên şoreşê, nû dikin.
Rêveberiya Xweseriya Demokratîk ku wekî berhema vê şoreşê derket holê yek ji destkeftiyên wê yên herî berbiçav e. Wê bingehên Rêveberiya Sivîl, beşdariya hemû pêkhateyan di biryardayînê de û bi destxistina ewlehî û aramiyê di demên herî aloz û xeternak ên dîroka herêmê de danî. Bi saya têkoşîna gel û îradeya wan a azad herêmên Bakur û Rojhilatê Sûriyê bûne nimûneyek ji bo jiyana aştiyane, rêveberiya baş û pêşketina civakê li seranserê Sûriyê.
Di salvegera 13`emîn a destpêkirina vê şoreşa pîroz de, em gelê xwe yê mezin silav dikin ku bi wêrekî di vê şoreşê de şer kir û herêmên xwe kir mînakek zindî ya fedakarî, biryardarî û afirîneriyê û pêşveçûna projeya demokratîk. Ev gelê ku ne tenê parastina xwe kir lê belê li hember terorîsta cîhanî DAÎŞ`ê li şûna tevahî cîhanê şer kir û serkeftineke dîrokî ji bo mirovahiyê bidest xist.
Em wek Rêveberiya Xweseriya Demokratîk a Herêma Bakur û Rojhilatê Sûriyê teqeziyê li ser girêdana xwe bi destkeftiyên Şoreşa 19`ê Tîrmehê ve nû dikin û parastina van destkeftiyan û pêşxistina projeya demokratîk, banga xebatên hevbeş dikin, da ku beşdarî avakirina Sûriyeke nû li ser bingeha nenavendîbûn û demokrasiyê bibin.”
