Di 18’ê Adarê de, dema şervanên YBŞ’ê li ser erka xwe ya parastinê bûn, li navenda Şengalê ketin kemîna hêzên artêşa Iraqê. Di encamê de pevçûn derket û 5 endamên YBŞ’ê bi birîndarî ketin destê artêşa Iraqê.
Saziyên Civaka Sivîl ên Êzidî li ber Peykerên Cangorî yê li Gundê Salox a Navenda Şengalê bi amadebûna gelek kesî û nûnerên pêkhateyan daxuyanî dan. Di daxuyaniyê de hate destnîşankirin ku bûyera rû dayî nabe nîşaneya têkiliyên biratiyê ya di navbera civaka Êzidî û hêzên ewlekariyê de û ev tişt hate gotin: “Di şerê dijî terorê de hevkariyeke hevpar hatiye kirin û ji bo parastina Iraqê şehîd hatine dayîn.”
Di daxuyaniyê de Saziyên Civaka Sivîl a Êzidî bi daxuyaniyekê bangek lezgîn li Serokwezîrê Iraqê Mihemed Şiya Sûdanî kir ku 5 şervanên wan ên 18’ê Adarê ji aliyê artêşa Iraqê ve bi birîndarî hatine girtin bên azadkirin. Di daxuyaniyê de, şervanên dîl hatine girtin weke “Leşkerên dilsoz ên Iraqê” hate pênasekirin û daxwaza azadkirina şervanan hate kirin ku bi nêzîkbûna sala nû ya Êzidiyan re wê bibe nîşaneya lêborîn û nêzîkbûna aliyan.
Di dewama daxuyaniyê de xebatên hikûmetê ya ji bo avakirina Şengalê hate pîrozkirin û banga lezgîn a xizmetgûzariyê û dabînkirina pêwîstiyên esasî yên ji bo vegera koçberan a bi ewle û dawîkirina êş û janên bi hezaran malbatan ên bi salan di nava şert û mercên zehmet de jiyan kirine.
Dayikên Şervanên YBŞ ku di 18’ê Adarê de di encama kemîna artêşa Iraqê de bi birîndarî hatibûn girtin, li ber navenda Îstîxbaratê ya li Şengalê çalakiya nobedê dan destpêkirin. Çalakî di roja 5’emîn de berdewam dike.
