OHD, TOHAV, ÇHD, THÎV û ÎHD li avahiya ÎHD’a Stenbolê têkildarî girtiyê nexweş Mehmet Edîp Taşar daxuyanî da. Daxuyanî ji aliyê Endamê OHD’ê Baran Elma ve hat xwendin.
Baran Elma diyar kir ku girtiyê nexweş Mehmet Edîp Taşar yê 70 salî ji 27ê Kanûna 2022’yan ve li Girtîgeha Marmareyê ya hejmara 5’an de tê girtin û got: “Îro rewşa Mehmet Edîp Taşar di bin xeteriyekî mezin de ye. Mehmet Edîp Taşar heta îro 19 caran anjiyo bûye. Ji Mehmet Edîp Yaşar nexweşiya dil, şekir, tansiyon, prostat, KOAH û gurçikê heye. Di hevdîtina ya parêzerê xwe re ya 9’ê Sibatê de bi kursiyê biteker ve derketiye. Bi teneya serê xwe nikarê êdî xwarin jî bixwe. Her ku diçe nexweşiyên Mehmet Edîp Taşar dijwartir dibe û divê ameliyat bibe. Di serlêdanan de ji aliyê lijneyên çavderiyê ve biryara “dikarê li girtîgehê de biminê” hate dayîn. Di vê hefteyê de Mehmet Edîp Taşar serî li Dadgeriya Bakirkoyê daye lê hê tu biryar ne hatiye dayîn.”
Baran Elma destnîşan kir ku girtina Mehmet Edîp Taşar êşkence ye û wiha got: “Mehmet Edîp Taşar di 12’ê Sibatê de dîsa rakirin nexweşxaneyê û anjiyo kirin. Her roja ku Mehmet Edîp Taşar di girtîgehê de tê ragirtin jiyana wî dixê di bin xeterê de û binpêkirina mafê jiyana derdixê holê. Di Paketa Darazê ya 11’emîn de rewşa girtiyên nexweş cih negirt, ev biryar di hiqûqa netewî de tune ye. Divê Tirkiye li pişt peymanên ku îmzekiriye bisekine. Astengiyên ku pêşiya tedawiya girtiyên nexweş divê bê rakirin. Ji bona wê divê Mehmet Edîp Taşar demildest bê berdan.”
