Rodriguez roja Sêşemê li ser televîzyona dewletê got: ‘’Venezuela, ji aliyê hikûmeta Venezuelayê ve tê birêvebirin, ne ji aliyê hêzeke din ve.’’
Trump jî li ser hesabê xwe yê medyaya dijîtal Truth Socialê daxuyaniyek da û diyar kir ku rêveberiya Venezuelayê ya demkî wê di çarçoveya pêkanîn de di navbera 30 û 50 milyon warîlî de petrola baş teslîmî DYE’yê bike.
Trump destnîşan kir ku wê ev petrol ji buhayê piyaseyê were firotin û qezenca wê jî weke serokê DYE’yê di destê xwe de bigire û anî ziman ku ew ê pereyan ji bo başiya gelên DYE û Venezuelayê xerc bike.
Rodriguez, di daxuyaniya xwe ya sê rojan piştî binçavkirina Serokdewletê Venezuelayê Nicolas Maduro û hevjîna wî ya li Floresê de, operasyona berbehs weke ‘’binpêkirina hiqûqa navneteweyî ya eşkere’’ pênase kir.
Ji bo kesên ku di encama operasyonê de jiyana xwe ji dest dane jî îfadeya ‘’Şehîdên ji bo parastina Venezuelayê jiyana xwe ji dest dane’’ bi kar anî.
ŞÎNA 7 ROJAN
Hate ragihandin ku di encama operasyona DYE’yê de 55 kesan jiyana xwe ji dest dane, ji wan 23 kes endamên artêşa Venezuelayê ne û 323 kes jî erkdarên ewlehiyê yên Kubayî ne. Rodriguez got: ‘’Gelê Venezuelayê wê teslîm nebe, ji bo parastina welatê xwe li ser piyan e.’’
Rodriguezê ku ji sala 2018’an ve ye erka alîkarê serokatiyê bi rê ve dibir, roja Duşemê li gel piştgiriya Dadgeha Bilind û artêşê li Meclîsa Neteweyî sond xwar û weke serokê dewletê yê demkî dest bi kar kir. Her wiha Rodriguez ji bo kesên di encama operasyona DYE’yê de jiyana xwe ji dest dane jî li welêt ji bo heft rojan şîn îlan kir.
DAXWAZA QUTKIRINA TÊKILIYA LI GEL ÇÎN, RÛSYA, ÎRAN Û KUBAYÊ
Her wiha li gorî nûçeya ABC Newsê, rêveberiya DYE’yê ji Venezuelayê xwestiye ku têkiliyên xwe yên li gel Çîn, Rûsya, Îran û Kubayê qut bike. Di nûçeyê de hate diyarkirin ku Washingtonê ji Venezuelayê xwestiye ku di hilberîn û firotina petrolê de bes li gel DYE’yê kar bike û di firotina petrola xav de pêşaniyê bide DYE’yê.
