Rojên Fîlmên Kurdî yên Viyanayê (Rojên Fîlmên Serçavan) hilbijartinek ji fîlmên dirêj, belgefîlm û kurtefîlman pêşkêş dikin ku aliyên cihêreng ên çand, dîrok û rastiya civakî ya Kurdistanê vedikolin.
Rojên Fîlmên Serçavan ku îsal 11’emîn care bi piştevaniya rêxistinên cuda ji aliyê Meclîsa Civaka Kurd a Awusturyayê (FEYKOM) û Komeleya Xwendekarên Kurd (YXK) ve tê organîzekirin, berhemên derhênerên xelatgir ji seranserê Kurdistan û Ewropayê nîşan dide. Wekî beşek ji bernameyê, kampanyayek berhevkirina pereyan dê ji bo sînemayek ku li Amûdê ya Rojava were çêkirin were destpêkirin.
FEYKOM’ê diyar kir, “Em kêfxweş in ku îsal dîsa temaşevanên xwe li Votivkino pêşwazî dikin.”
HÛRGILIYÊN BERNAMEYÊ
Rojên Fîlmên Serçavan dê piştî axaftinên vekirinê bi pêşandaneke muzîkê ya hunermendê Kurdafon Omîd Derwîş dest pê bike. Belgefîlma “EREN”, dê di vekirinê de were nîşandan. Ev belgefîlm serpêhatiya têkoşînên kesane û pîşeyî ya hevseroka Komeleya Mafên Mirovan Eren Keskîn ku bi parêzvaniya xwe li dijî êşkence, şîdeta zayendî û cudakariyê li Tirkiyeyê tê nasîn, vedihewîne. Piştî pêşandanê Eren Keskîn wê bi rêya onlineyê beşdar bibe û bersiv bide pirsên temaşevanan.
ROJA DUYEMÎN A BERNAMEYÊ
Di roja duyemîn de dê kurtefîlmên ji 6 heta 20 deqeyan were nîşandan. Fîlmên ku dê werin pêşandan ev in: ‘Red Room’, ‘Kwistan’, ‘Zaam’, ‘Dancing Amid Fire’, ‘Rising Above Ruins’ û ‘YARÊ’. Êvar dê bi pêşandana fîlma dirêj a derhênerê Viyanayî Kurdwin Ayub Mond (heyv) bi dawî bibe. Ev fîlm berdewama fîlmê yekem ê bi navê Sonne e (Roj) ê derhêner Ayub e ku behsa têkoşîna ji bo azadî, kontrol û xwerêvebirinê dike.
ROJA ÎNÊ 3 FÎLM
Bernameya roja Înê wê bi fîlma Muharrem und Xewna Bê Ziman dest pê bike. Li dû wê dê fîlmên Naharina û The Virgin & Child werin nîşandan ku ev berhem li ser serpêhatiyên trawmatîk û têkoşîna azadiyê ya di bîra kolektîf a Kurd de cih digire nîşan bide.
FÎLMÇÊKER DÊ NÎQAŞ BIKIN
Roja Şemiyê, fîlmên ‘Asadur’, ‘Tevî her tiştî’, ‘Hat Nehat’, ‘Xweş Xeber’, ‘KURMÊ DARÊ’ û ‘Eine Brucke nach Rojava (Pirek ber bi Rojava) dê werin nîşandan. Di 1’ê Mijdarê saet 14:00’an de wê panelek li Schauspielhaus a Viyanayê di çarçoveya bernameyê de bê lidar xistin. Fîlmçêkerên wekî Essmat Sophie, Ekrem Heydo û Robert Krieg dê bi temaşevanan re li ser fîlmên hatine nîşandan, nîqaş bikin.
ROJA DAWÎ JÎ TIJE YE
Roja dawiyê ya bernameyê wê kurtefîlmên weke ‘Garan’, ‘After What’ û ‘Şiwênpence’ bên nîşandan. Di fîlmên dawîn de dê ‘Vartinîs’ û ‘Siwariyên Şengalê’ hebin. Ev berhem trawmayên kûr ên di bîra kolektîf a gelê Kurd de bi rêya çîrokên trajîk ên kesane tînin ser ekranê.
CIHÊRENGIYA ÇANDÎ DÎTIN
Seroka herêmî ya çalakiyê Saya Ahmad, kêfxweşiya xwe ji ber ku Rojên Fîlman li navçeya 9’an têne lidar xistin anî ziman û diyar kir ku festîval têgihîştinek kûr a jiyana tebeqeyî ya Kurdan pêşkêş dike û ev çîrok bi niştecihên Alsergrund re têne parve kirin. Saya Ahmad, anî ziman ku festîval, huner û çand ji bo her kesî ye û got ku hevgirtinê xurt dike û dewlemendiya çanda Kurdî nîşan dide.
Endama Konseya Şaredariyê û Berpirsyara Huner û Çandê Veronica Kaup-Hasler, jî da xuyakirin ku Fîlmên Serçavan yekîtîya li ser bingeha rêzgirtin, vekirîbûn û hêza hevpar temsîl dike û got ku bi hilbijartinên fîlmên cihêreng û hevpeyvînan hawîrdorek parvekirinê ya zindî diafirîne.
BÎLET DIKARIN BÊN PEYDA KIRIN
Bilêtên ji bo Rojên Fîlman ên Serçavan ji 8’ê Cotmeha 2025’an vir ve li ser înternetê bi rêya Votivkino.at û rasterast li kaseya Votivkino peyda dibin. Bihayê bilêtê: 10.50 €
https://www.votivkino.at/festival/sercavan-kurdische-filmtage/
