Pirtûka nivîskar Mahmût Aba ya “Dildarê Serketinê” û pirtûka siyasetmedar Hatîp Dîcle “Rojnivîskên Berxwedana Efrînê” ji hêla Weşanxaneya Aramê ve hatibûn çapkirin. Di 8’emîn Fuara Pirtûkan a Amedê de ku di navbera 30’ê Mijdarê û 8’ê Kanûnê de hatibû lidarxistin, polîsan dest danîn ser her du pirtûkan. Piştre jî ji bo her du pirtûkan biryara komkirinê hate derxistin. Serdozgeriya Komarê ya Amedê jî der heqê xwediyê weşanxaneyê rojnameger Hakki Boltan de bi îdiaya “propagandaya rêxistinê” lêpirsîn da destpêkirin.
Boltan tevî parêzerê xwe Resûl Tamur çû Şaxa TEM’ê ya Midûriyeta Emniyetê ya Amedê û îfade da. Di çarçoveya lêpirsînê de ji Boltan pirsên weke “Te çima ev pirtûk çap kir?”, “Tu nivîskaran nas dikî yan na?”, “Ji bo çapkirina pirtûkan tu kesan ferman daye te yan na?” û hwd. hatin kirin.
Derketibû holê ku polîsan bêyî biryareke komkirinê hebe dest danîbûn ser pirtûkan û 37 roj piştre der heqê pirtûkan de biryara komkirinê hatiye dayin.
