Rûken Akça got, “Berxwedanên jinan divê guherîna civakî armanc bikin.” Akça banga mezinkirina têkoşîn û rêxistinbûnê kir.
Bi wesîleya 8’ê Adarê Roja Jinên Kedkar ên Cîhanê em bi Hevseroka Konfederasyona Civakên Kurdistanî yên li Elmanyayê (KON-MED) Rûken Akça re têkildarî têkoşîna dîrokî ya Tevgera Jinên Kurd û tevkariyên wê yên ji bo tevgera jinên cîhanê axivîn.
Hevseroka KON-MED’ê Rûken Akça diyar kir ku 8’ê Adarê roja berxwedan û azadiya jinên kedkar e, ji bo jinên Kurd jî roja têkoşîneke dîrokî ye û got, “Weke jin me di têkoşîna li dijî sîstema kapîtalîst û mêtingeriyê de, di refên herî pêş de cih girt û berdêlên mezin da. Jinên Kurd berxwedanê ne tenê ji bo gelên xwe, bi tevgera jinên cîhanê re weke têkoşîneke azadiyê ya hevpar dibînin. Îro dema li Rojhilata Navîn azadiya jinê tê gotin, destpêkê şoreşa jinê ya li Rojava tê bîra mirov. Jinên Kurd bi paradîgmaya Rêber Abdullah Ocalan a li ser esasê azadiya jinê, xwe pêş xistin û guhertin. Ev paradîgma ne tenê ji bo jinên Kurd, ji bo jinên cîhanê jî bû çavkaniyeke îlhamê ya mezin.”
‘JIN JIYAN AZADÎ ÊDÎ ŞÊWAZEKÎ JIYANÊ YA GERDÛNÎ YE’
Rûken Akça destnîşan kir ku jinên Kurd bûne xwedî hêz ku ne tenê li Kurdistanê, li her çar aliyên cîhanê pêşengiyê ji têkoşîna jinê re bikin û ev tişt bilêv kir: “Felsefeya ‘Jin Jiyan Azadî’ êdî bûye sembola berxwedana jinan a gerdûnî. Divê jin ne tenê weke nasname, weke hêza cewherî ya civakê jî xwe rêxistin bikin. Konfederalîzma jinê û modela rêveberiya xweser a demokratîk a li Rojava, alternatîfeke şênber pêşkêşî tevgerên jinên cîhanê dike. Weke jinên Kurd me di têkoşîna azadî û aştiyê de, berdêlên pir giran dane. Bi hezaran hevrêyên me şehîd bûn. Hêzên faşîst û paşverû ji bo îradeya jinan teslîm bigirin, her cure êrîş pêk anîn. Lê belê em jin şûna ku serî li ber zextê bitewînin, em hîn xurttir bûn û me têkoşîn mezin kir.”
Akça ragihand ku gefa herî mezin ew e ku modernîteya kapîtalîst hewl dide têkoşîna jinê parçe bike û bi vî rengî bê bandor bike. Akça diyar kir ku eger jin werin ba hev û xwe rêxistin bikin, hingê wê guhertina civakî jî çêbibe û got, “Ne zext, ne jî êrîş nikarin me ji têkoşîna me qut bikin.”
BERXWEDANA JINÊN LI ZINDANAN
Rûken Akça diyar kir ku Rêber Apo gelek caran aniye ziman, heta jin azad nebin, civak jî azad nabe û axaftina xwe wiha domand: “Jineolojî ya ji aliyê Rêber Apo ve hatî pêşxistin, têkoşîna jinê tenê weke lêgerîneke maf na, weke bingehê esas ê guherîna civakî dinirxîne. Ev peyam ji bo jinên li girtîgehan li ber xwe didin jî, xwedî wateyeke mezin e. Berxwedana jinên girtî, îspat dike ku di nava şert û mercên herî zehmet de jî azadî û îrade nayê teslîmgirtin. Bi vê wesîleyê ez 8’ê Adarê Roja Jinên Kedkar ên Cîhanê li hemû hevrêyên me yên jin ên li zindanan pîroz dikim û wan silav dikim.
Îro jinên Kurd, li her qada jiyanê bi rengekî xurt û cesaret têkoşîna xwe didomînin. Heta ku maf, edalet û aştî tê cîhan û Rojhilata Navîn. Ji bo vê hêza me ya herî mezin, rêxistinbûna me ye. Hingî ku jin xwe rêxistin bikin, wê azad bibin. Berxwedana jinan, tenê bi destkeftiyên şexsî re sînordar namîne; guherîna civakî jî armanc dike. Azadî tenê ji bo gel yan jî herêmekê na, ji bo hemû jinên cîhanê wê bi têkoşîneke hevpar were qezenckirin. Lewma em banga mezinkirina rêxistinbûn û têkoşîna xwe dikin. 8’ê Adarê ne tenê rojeke pîrozbahiyê, divê bibe roja destpêka serketin û têkoşînên nû. Jin, Jiyan Azadî!”
