Di çarçoveya nîqaşkirina pêvajoya ku bi banga 27’ê Sibatê destpê kir, şandeyekî nêzî ji 50 kesên di qada navneteweyî de naskirî pêk tê, diçe Stenbolê.
Di şandeya navneteweyî ku wê bi rojeva pêvajoyê biçe Stenbolê de akademîsyen, sendîkavan, endamên rêxistina sivîl, rojnamevan, hiqûqnas, parlamenter, femînîst, zanyar, nivîskar, lêkolînvan û şaredarivanên ji Awusturya, Elmanya, Îtalya, Îspanya, Katalonya, Fransa, Swîsre û Japonyayê hene.
Serdan û hevdîtinên şandeyê wê di 1’ê Tîrmehê de destpê bike. Şande ewilî wê serdana Buraya Hiqûqê ya Asrinê bike û bi parêzerên Rêber Apo re hevdîtinê bike. Piştre li Rêxistina DEM Partî ya Stenbolê bi Hevserokê Giştî yê partiyê Tuncer Bakirhan re hevdîtinê bike. Tê payîn ku hem bi Buroya Hiqûqê ya Asrin re hem jî bi Tuncer Bakirhan re nêrînên hev bigirin.
Şandeyê di 2’ê Tîrmehê de jî wê li Taksîm Hill Otelê civîna maseya girover pêk bîne. Tê payîn ku di vê civînê de hemû beşdar biaxivin û nêrîn û pêşniyarên xwe yên têkildarî pêvajoyê parve bikin. Tê payîn ku piştî vê civînê deklerasyonekî têkildarî pêvajoyê were ragihandin.
Şandeyê di heman demê de wê di çarçoveya kampanyaya ‘Ez dixwazim hevdîtinê bi Rêber Apo re bikim’ de ji bo çûyîna Îmraliyê serlêdana fermî bike.
