Hevseroka Meclîsa Malbatên Şehîdan a Kantona Firatê Sara Xelîl ku yek ji şahidên berxwedaniya Kobanê ya sedsalê bû û niha careke din li Kobanê li ber xwe dide, ji ANF’ê re axivî. Sara Xelîl dibêje ku çi dibe bila bibe ew ê dev ji vî bajarî bernedin û got, Kurd li her derê yek in.
“Şervanên me li her derê berxwedanî kirin, li Kobanê jî ruxmî çekên herî sivik jî berxwedaniyeke bê hempa raber kirin. Bi derbasbûna gel a Bakurê Kurdistanê re xwestin netewa Kurdî li wir qir û tune bikin. Lê partiyên me yên li wir bûn pira parastina gelê Kurd û ew ji qirkirinê parastin. Gelê me yê li Bakurê Kurdistanê jî li ser sînor li ber xwe dan û li wir nobeta berxwedaniyê heta kêliya dawiyê jî meşandin.”
Sara anî ziman ku ew xwedî îradeyeke ji pola ne û got: “Gelê me li her dera Kurdistanê xwe digihîne hev. Em dibin yek ruh û berxwedaniya me bi wê yekê bi ser dikeve. Li Kobanê jî wiha bû, bi çekên herî sivik şervanên me li ber xwe dan û di şerê Kobanê de têk çûn. Bi taxekê terora DAÎŞ’ê têk birin. Niha jî careke din dewletên desthilatdar êrîşên xwe dewam kirin.”
Sara Xelîl destnîşan kir ku di her salvegera rizgarkirina Kobanê de êrîş tên kirin û got, “Xwestin Kobanê tune bikin, lê planên wan vala derdikeve. Di her meha rizgarkirina Kobanê de ew dixwazin li Kobanê careke din êrîşa qirkirinê pêk bînin, di sala borî de şerê li bendava Tişrînê û niha jî Kobanê kirine dorpêçê û dixwazin Kobanê qir û tune bikin. Niha jî ji herdû taxên Kurdan Şêxmeqsûd û Eşrefiyê ev êrîş destpê kirin û xwestin bi wê yekê re dest bi qirkirinê bikin. Lê bi pêşengtiya fermandarê mezin Ziyad, ew careke din têk çûn. Berê xwe dan bajarê Kobanê û niha li vir di nava dorpêçeke giran de ne û hemû pêdiviyên jiyanê li ser me birîne.”
MAL Û MILKÊN XELKÊ TÊN TALANKIRIN
Sara Xelîl diyar kir ku ruxmî hemû pêdiviyên jiyanê jî tune ye lê em di berxwedaniya xwe de bi israr in ku çi dibe bila bibe em ê li ber xwe bidin û got, “Armanca wan ew e ku tola têkçûna xwe ya li Kobanê hilînin. Hemû pêdiviyên jiyanê li Kobanê qut bûne. Em ê li ser axa xwe bimîn in. Ne kehrebe, ne av û ne jî şîrên zarokan, hemû pêdiviyên jiyanê tune ne. Lê em ê israra xwe ya berxwedaniyê her bilind bikin û bi wê yekê re jî bi ser bikevin. Niha jî gelek gundên Kurdan ên girêdayî bajarê Kobanê ji aliyê çeteyan ve hatine talankirin, dizîna mal û milkên xelkê jî kirine. Gel dema diçin malên xwe, tiştekî di malên xwe da nabînin. Ew erebeyên xwe disekinînin û malên xelkê talan dikin.”
Sara di dawiyê de spasiya gelê Kurdistanê kir û wiha axaftina xwe bi dawî kir: “Berxwedaniya vî gelî hişt ku Kurd bi ser bikeve û em bi wê yekê re bi ser ketin, ruxmî ku gelê me niha di dorpêçê de ye lê dîsa jî îrade û israra me ya serkeftinê her diçe mezintir dibe. Em sînor û tiştekî nas nakin, dema ku tiliyekî Kurdekî jî birîn bibe bi milyonan Kurd radibin ser piyan.”
