Saziyên Zimanê Kurdî têkildarî mitînga ‘Hêvî û Azadiyê’ daxuyaniyek dan çapemeniyê, ku wê 4’ê Çileyê li Qada Stasyonê ya Amedê bê lidarxistin. Saziyên ziman bi hemwextî li Amed, Wan, Şirnex û Enqereyê daxuyaniya hevpar dan û banga beşdariya mitîngê li gel kirin.
Daxuyaniya li Amedê li avahiya Komeleya Lêkolînê ya Zanistên Civakî ya Kurdî (KOZA-DER) hate dayîn. Endamên û rêveberên saziyên zimanê Kurdî û gelek kes tev li daxuyaniyê bûn. Metna daxuyaniyê bi Kurmancî Hevserokê KOZA-DERê Murat Bîlgîç û ya Kurmanckî jî Hevseroka MED-DERê Şukran Yakut xwend.
Metna daxuyaniya hevpar bi vî rengî ye:
“Ev demeke di pêşengiya Rêber Abdullah Ocalan û Tevgera Azadiya Gelê Kurd de, bi hewldanên hemû derdorên azadîxwaz, demokratîk û aştîparêz pêvajoyeke avakirina civateke demokratîk û aştiyeke birûmet di rojevê de ye.
Bêguman, ji bo ku civateke demokratîk bê avakirin û aştiyeke birûmet a mayînde bê sazkirin berî her tiştî divê pergaleke demokratîk bê sazkirin. Riya vê yekê jî, berê her tiştî di azadiya fîzîkî ya Rêber Abdullah Ocalan û hemû dîlgirtiyên polîtîk û ji qebûlkirina hemû mafên me kurdan ên herî xwezayî, civakî û neteweyî re derbas dibe; ku ji bo vê jî divê hemû pêwistiyên hiqûqî û siyasî bên bicihanîn. Bi taybetî jî divê statuya zimanê Kurdî û perwerdehiya bi kurdî bê qebûlkirin û pêkanîn.
Helbet ji bo ku ev yek jî pêk bên divê em hemû Kurdên azadîxwaz û derdorên aştîparêz têkoşîna xwe li her qadê bilindtir û berfirehtir bikin.
Baş tê zanîn ku azadiya fîzîkî ya Rêber Abdullah Ocalan û bidestxistina mafên herî xwezaayî, neteweyî û civakî yên kurdan rasterast têkildarî hev in. Azadiya Rêber Ocalan di heman demê de azadiya zimanê Kurdî û nirxên Kurdan e. Ji ber vê yekê divê azadiya Rêber Ocalan a fizîkî pêk bê.
Bi vê armancê 4’ê Rêbendanê, li Amedê, ‘Mitînga Hêvî û Azadiyê’ tê lidarxistin.
Em bang û gazî li hemû partî, sazî û derdorên Kurd, demokratîk û aştîxwaz, bi taybetî jî bang û gazî li hemû derdorên Kurdîparêz û gelê xwe dikin ku bi coşeke mezin beşdarî mitîngê bibin, ji bo civateke azad û aştiyeke birûmet dengê xwe bilind bikin.”
