Li Wargeha Penaberan a Şehîd Rustem Cûdî (Mexmûr) Şehîd Pîran Suweyda (Çîmen Alturk) û Şehîd Diljîn Bêlatî (Zeynep Demîroglû) ku di 1’ê Mijdara 2024’an de li Herêma Şehîd Delîl a Rojavayê Zapê di êrişa dewleta Tirk a dagirker de şehîd bibûn, di yekemîn salvegera şehadeta xwe de hatin bîranîn.
Merasîma bîranînê li Saziya Malbatên Şehîdan bi kombûna gel û xwendevanan, di kesayeta Şehîd Pîran û Şehîd Diljîn de bi deqeyek rêzgirtinê destpê kir.
Li ser navê malbata Şehîd Pîran dayîka wê Neam Alturk axivî û di serî de xêrhatina hemû xelkê amade kir û got: “Ez wek dayîka şehîd, spasiya we hemûya dikim. Çiqas ez dihizirim jî mirov nikare keda van şehîdan bîne ziman. Di serî de serê Serokatî, gerîlayên serê çiyan, berxwedanvanên zindanan, dayîk û bavên şehîdan û gelê amade sax be.”
Her wiha mamê Şehîd Pîran Bedran jî hestên xwe anî ziman û di serî de xêrhatina gelê amade kir û ev tişt got: “Di kesayeta Şehîd Pîran de hemû şehîdên doza azadiyê bibîr tînin û bejna xwe li ber wan ditewînin. Wek hûn jî dizanin di şerê 41 salan de bedelên gelek mezin hatin dayîn. Eger em îro li vê derê kom dibin, nêrîn û hestên xwe tînin ziman bi keda wan şehîdanin. Eger di Rojhilata Navîn de û bi taybet li Tirkiye û Kurdistanê pêvajoyek hatiye destpêkirin, ev jî bi keda şehîdan û îradeya Rêbertî ya li Îmraliyê ye. Em niha di hizûra şehîdan û malbatên şehîdan de ne, em çiqas bêjin jî mirov nikare keda wan bîne ziman yan jî pênase bike. Niha tenê tişta ku dikeve li ser milê me wek gel û malbat, em berpirsyartiyên xwe yên demê pêk bînin.”
Her wiha Endamê Saziya Malbatên Şehîdan Sedîq Heştanî jî axivî û got: “Em jî dibêjin di serî de serê Rêbertiya me, rêhevalên wan, malbata hêja û gelê amade saxbe. Em çiqas bêjin jî em nikarin bi gotinê dawî bikin, encex li ser rêya wan şopandin û doza wan bicih anîn û xwesteka wan pêkanînê em serbikevin.”
Bîranîn bi temaşekirina sînevîzyona li ser jiyan û têkoşîna Şehîd Pîran û Şehîd Diljîn bi dawî bû.
Piştî sînevîzyonê dirûşmeyên ‘Bijî Serok Apo’ û ‘Şehîd Namirin’ hatin berzkirin.
