Jineke ciwan êş, zilm, wêrekî, raperîn, berxwedan û têkoşîna bi salan a gelê Kurd di dilê xwe de hildigirt. Vê jin a ciwan ku şahidî ji zilma dagirkeran û têkoşîna bi lehengî ya gel û gerîla re dikir, ev têkoşîn bi tîpên zêrîn li kûrahiya dilê xwe neqişand; ji ber vê yekê dil da doza gel û partiya wê.
Yekbûn Şoreş (Nîsan Ay) jineke têkoşer e ku xiyanet li xeyalên xwe yên zarokatiyê nekir û li gel zor û zehmetiyan jî xwe gihand çiyayên welêt.
Nîsan Ay li nava malbateke welatparêz ji dayik bû ku berdêlên giran da. Bi çîrokên lehengiyê yên li zindana Amedê û berxwedana gerîlayên azadiyê mezin bû. Hîn zarok bû, şahidî ji hovîtiya dagirkeran re kir. Qet ji bîr nekir ku leşkeran nîvê şevê avêtin ser mala wan. Li gel ku zarok bû û ji dijmin ditirsiya jî ev tirs bi demê re jê re bû hêrs û kîn. Bi taybetî bi şehadeta xalên xwe re bi kîn û nefret mezin bû. Nîsan kete nava lêgerîna wê yekê ku bersivê bide van êrîşan û dagirkeran.
Malbata Nîsan ji ber zext û êrîşên dijmin neçar ma ku warê xwe biterikîne. iştî ku gundê wan hate talankirin û şewitandin koçî Îzmîrê kirin. Ji bo Nîsan û malbata wê jiyan êdî nû û cuda bû.
Nîsan ji bo piştgiriyê bide malbata xwe dest bi kar kir. Li gel ku ev kar ji bo wê zehmet jî bû bi saya vê pêvajoyê rastiya sîstema kapîtalîst hîn baştir analîz kir. Dijmin hîn bêhtir ji nêz ve nas kir û ev yek jî bû wesîle ku bi gaveke din nêzî xeyalên xwe yên salan bibe. Piştî hewldana xwe ya çaremîn di Sibata 2019’an de ku weke meheke komployê jî tê naskirin, ji bo bersivê bide komplogeran tevlî nava refên azadiyê bû û sekn û hêrsa xwe careke din nîşan da. Tevlîbûna di demeke bi vî rengî de li ser bingeha tevlîbûneke li gorî pêwîstiyên demê û bi zanebûn bû.
XEWN Û XEYALÊN XWE YÊN ZAROKATIYÊ PÊK ANÎ
Nîsan piştî gelek zor û zehmetiyan di sala 2019’an de xwe gihand xeyalên xwe yên zarokatiyê; armanca xwe dawiya dawî pêk anî. Xeyal êdî ji bo wê bû rastî û Nîsan bi navê Yekbûn Şoreş gav avêt nava jiyana şoreşgerî. Bi coş û kelecaneke mezin tevlî nava perwerdeyê bû; bi fikrên Rêber Apo re bû yek. Xweset jiyana şehîdan rast fêhm bike û bide ser şopa wan. Gerîla Yekbûn bi rengekî bi biryar û xurt tevlî nava têkoşînê bû, bi fedakarî berpirsyarî da ser milê xwe. Di pêvajoya perwerdeyê de tişta ku ji xwe re kir ew bû ku di bingeha têkoşînê, rastiya jinê û hevrêtiya PKK’ê de xwe nas bike. Dilxwaziya wê ya li tevlîbûnê û jiyanê kir ku gavên xurt biavêje. Gerîla Yekbûn perwerdeya xwe bi rengekî serketî û bi coşeke mezin qedand û li Herêmên Parastinê yên Medyayê beşdarî nava karên pratîkî bû.
Gerîla Yekbûn tecrûbeya xwe ya destpêkê li nava yekîneyên xweser wergirt. Ev yek ji bo wê bû piştgiriyeke mawewî û hêzê ya xurt. Di heman demê de bi eleqeyeke mezin tevlî nava kar bû, ji bo karibe her gavê bi serketî derbas bike di nava guherîn û veguherînê de bû. Bi demê re xwe hîn bêhtir bi gerîlatiya jinê ve girêdayî hîs kir. Di her qonaxa jiyanê de ji bo gerîla Yekbûn fedakarî û ked li pêş bû. Bi sekn, eleqe, telvîbûna xwe ji hevalên xwe re b3u çavkaniyeke mezin a moralê, ji ber vê yekê jî di demeke kurt de kete dilê hevrêyên xwe hemûyan. Bi taybetî li gel zor û zehmetiyan jî hêvî û berxwedana li ser rûyê wê ti carî kêm nebû. Şehîd Yekbûn ji bo karibe taktîkên demê bi cih bîne û tola bi salan ji dagirkeran hilîne beşdarî nava pêvajoya perwerdeya leşkerî bû. Armanca bingehîn a Gerîla Yekbûn ew bû ku bawerî û çalakiya xwe bike yek û bixe meriyetê. Bi vê armancê bi berpirsyarî rabû.
Bi soza ku dabû hevrêyên xwe yên şehîd wezîfeyên xwe bi xurtî bi cih anî. Di pêvajoya perwerdeyê de fêhm kir ku çiqasî encamên xurt bi dest bixe wê ewqasî jî derbên giran karibe li dijmin bixe. Bi saya vê hewldana xwe perwerdeya xwe bi serketî qedand. Piştî perwerdeyê bi daxwazeke mezin derbasî qada Metînayê bû. Hebûna wê ya li Metînayê hêzeke girîng tevlî berxwedanê kir. Ji ber ku ew bû parçeyek ji berxwedana dîrokî. Yekbûn her tiştên ku di perwerdeyê de hîn bû veguherand tevlîbûneke bi bandor û wate. Li refên herî pêş cih girt; bi saya çalakiyên xwe, tevlîbûna xwe ya li jiyanê, fedakarî û hevrêtiya xwe hêz û moral da hevalên xwe hemûyan. Bi kesayetiya xwe ya ku astengî nas nedikir û bi kesayetiya xwe ya fedakar li her qada jiyanê bi xurtî tevlî bû. Jiyan û têkoşîn ti carî ji hev cuda nedît, ev yek jî bû sedem ku di meşa xwe de serketinên mezin bi dest bixe.
19’ê Gulana 2024’an li herêma Metînayê dijminê dagirker dest bi êrîşan kir. Di navbera gerîla û leşkerên Tirk de şerekî giran qewimî. Di encamê de gerîla Yekbûn Şoreş şehîd bû û tevlî karwanê nemirên Kurdistanê bû. Bi hevrêtî, dilsoziya xwe ya bi jiyanê re, bi wêrekî û berxweedana xwe ji hevrêyên xwe re her tim bû nîşaneya têkoşîneke serketî û jiyaneke rast.
