Komxebata Jinên Êzidî ya li Şengalê bi pêşengiya TAJÊ tê lidarxistin, bi semînerên cûda dewam dike.
Beşdarên Konferansa jin a bi dirûşmeya; ‘Bi têkoşîn û rêxistinê, bibin pêşengên civaka demokratîk û azad’ têkildarî komxebatê ji ajansa Rojnews re axivîn û peyamên girîng dan.
Endama Komîteya Amadekar ya Komxebata Jinên Êzidî Sûham Şengalî li ser armanca lidarxistina komxebatê û naverokê axivî.
Sûham Şengalî da zanîn jin pêşengiyê ji pergala demokratîk a Şengalê re dikin û vê peyamê da: “Bi rastî komxebatên vî awayî gelekî girîngin. Bi taybetî li Şengalê pêşengî ji xebatên fikrî re kirin, erkeke esasî ya jinên Êzidî ye. Beşdarbûneke zêde ya jinan ji bo konferansa ronakbîrî ya di meha Tîrmehê de hate lidarxistin jî çêbû. Îro li vir derdora 150 jin amade ne. Zêdetir ji jinên di nava TAJÊ û Rêveberiya Xweser de cih digirin de pêktê ku pêşengiyê ji sîstema vir re dikin. Ev sîstem jî hebûn û azadiya civaka Êzidî diparêze.”
Sûham Şengalî di dewama axaftina xwe de da zanîn wê Şengal ji bo Êzidiyan bibe navenda ronakbîriyê û wiha pêde çû: “Her wiha di ronesansa Êzidiyan de wê parastina jinên Êzidî çawabe tê nîqaşkirin. Bi avabûna Asayîşa Jin û YJŞ’ê re em hêdî hêdî gav berbi pergala parastina jin ve jî diavêjin. Çawa jinên Êzidî ji rêxistinkirina civaka Êzidî re pêşengiyê kirin, wê ji îro pêve ji bo ronesansa Êzidiyan jî pêşengiyê bike. Ji jinên Êzidî yên derveyî welat û Bakur û Rojhilatê Sûriyeyê jî peyam ji bo komxebata me hat. Navenda xebatên fikrî û ronakbîrî ya Êzidiyan Şengale. Ji ber di warê bawerî û pîrozbûnê de jî Şengal ciheke taybete ji bo hemû Êzidiyan. Her tiştek li vir ava dibe, bandorê li hemû Êzidiyan dike.”
Sûham Şengalî destnîşan kir ku pêşengiyeke jin bike, wê pêşengiyeke rast be û axaftina xwe wiha bi dawî kir: “Rêber Apo gelek bawerî dide civaka Êzidî û jinên Êzidî. Civakeke jin jêre pêşengiyê bike, wê pêşengiyeke rast û xurt be. Ji ber vêya gelekî girîng bû ku TAJÊ pêşengiyê ji xebateke wisa fikrî re bike û rola xwe di hemû cihan de bilîze. Herî zêde jin dibin qurbanê zihniyeta di civakê de serwere. Ji ber vêya herî zêde jin dikarin biguherin. Jin dikarin bi awayeke zanistî û fikrî pêşî li hemû êrişan bigirin.”
Hevseroka Meclîsa Gel a Xanesorê Nafya Mêşo jî balkêşa ser peyama Rêber Apo ya ji bo jinên Êzidî û îşaret bi girîngiya xebatên fikrî ji bo jinan kir.
Nafya Mêşo di axaftina xwe de balkêşa ser van mijaran: “Rêber Apo bang li jinan dike ku xwe rêxistin bikin. Mexdûrên herî mezin ên fermanê jinên Êzidî bûn. Bi hezaran dayîk û keçên me ketin dest, di qefesan de hatin şewitandin. Rêbertî dibêje, ‘divê jinên Êzidî ji bo hemû jinan bibin nimûne’. Heta astekî jinên Êzidî xwe rêxistin kirine. YJŞ, Asayîş û rêxistina me heye. Azadî di fikir de destpê dike. Kesek di fikrê xwe de pak û azad be, ew weke fîzîkî jî azad dibe. Divê em xwe bi peyamên Rêber Apo rêxistin bikin. Jinên Êzidî wê êdî bindestî û zilmê qebûl nekin. Divê jinên Êzidî hew koletî û bindestiyê qebûl bikin, bêjin ‘em jî hene’.”
