Li gelek bajarên Kurdistanê ji bo azadiya fîzîkî ya Rêber Apo çalakî têne lidarxistin. Kurdistaniyên ku bi dirûşma ‘Em ji bo mafê hêviyê yê Rêber Apo ber bi azadiyê ve dimeşin’ daketin qadan, di çalakiyan de daxwaza azadiya Rêber Apo û guhertinên qanûnî yên pêwîst ên ji bo mafê hêviyê dikin.
Amediyên ku beşdarî meşa ‘mafê hêviyê’ bûn ji ANF’ê re axivîn.
‘DIVÊ BERSIV JI DAXWAZÊN KURDAN RE BÊ DAYIN, RÊBER APO AZAD BIBE’
Meryem Temîz diyar kir ku ji bo daxwazên gelê Kurd û azadiya Rêber Apo ew li qadan e û got, “Divê gelê Kurd êdî rabe ser piyan. Em dixwazin rijandina xwînê bisekine. Em ji bo Rêber Apo têdikoşin. Doza me doza ziman, çand û nasnameyê ye. Ji bo xwişk û biratiyê em têdikoşin. Yekane daxwaza me aştî ye. Ez dayikeke şehîd im, dixwazim rijandina vê xwînê bisekine. Bila êdî dayik negirîn, çar çarpeyên Kurdistanê bibin yek.”
‘MAFÊ HÊVIYÊ DIVÊ TAVILÊ BI CIH BÊ ANÎN’
Abdulhamît Şaloy anî ziman ku ‘mafê hêviyê’ divê tavilê bi cih bê anîn û got, “Birêz Serok Apo bi neheqî li zindanê tê hiştin. Em vê bêhiqûqiyê qebûl nakin. ‘Mafê hêviyê’ di qanûnên Ewropayê de heye. Dewleta Tirk van qanûnan nas dike lê belê bi cih nîne. Gelo Yekîtiya Ewropa çawa vê yekê qebûl dike? Li hemberî Tirkiyeyê divê pêkanînan ferz bike. Gelê Kurd daxwaza azadiya fîzîkî ya Rêber Apo dike û ji bo vê jî li benda gavê ye. Mafê hêviyê mafekî mirovahiyê ye.”
‘RÊBER APO HEBÛNA GELÊ KURD E’
Nûman Gokarar got, “Rêber Apo hebûna gelê Kurd e” û bi vî rengî dewam kir: “Piştî Pêxemberan mirovek, pêşengekî weke Rêber Apo nehate dinayayê. Rêber Apo li gorî berjewendiyên gelan tevdigere. Ji bo me sedema hebûnê ye. Rêber Apo ji bo me felsefe ye. Em dixwazin gerîla hemû tevlî nava gel bibe, Rêber Apo jî bigihêje gel û azad bibe. Em ji bo azadiya Rêber Apo li qadan e. Çi ji destê me bê em ê bikin.”
‘NAVNÎŞANA AŞTIYÊ BIRÊZ OCALAN E’
Dîlan Çetîn jî destnîşa kir ku ji bo azadiya fîzîkî ya Rêber Apo ew têdikoşin û got, “Em ku li qada zimanê Kurdî dixebitin, daxwaza azadiya Birêz Ocalan dikin. Ji bo bersiv ji daxwazên bingehîn ên gelê Kurd re bê dayin em têdikoşin. Mîmarê pêvajoya aştiyê Birêz Abdullah Ocalan e. Ji ber vê yekê hem ji bo gelên Kurdistanê hem jî ji bo yên Rojhilata Navîn divê azad bibe. Ji bo vê xakê navnîşana aştiyê Birêz Ocalan e. Em ê heta dawiyê daxwaza azadiya Birêz Ocalan bikin.”
