Dewleta Tirk a dagirker û çeteyên wê ji Kanûna 2024’an heta niha êrîşî Bendava Tişrîn û Pira Qereqozaqê dikin. Şervanên YPJ, YPG û QSD’ê bi ruheke fedaî û profesyoneltiyeke leşkerî li ber xwe didin û êrîşên dagirkeriyê vala derdixin. Şervanên azadiyê di eniyên berxwedanê de 8’ê Adarê Roja Jinên Kedkar ên Cîhanê bi coşeke mezin pêşwazî dikin.
Şervana YPJ’ê Rojbîn Ereb û Ronahî Çiya sê mehin di êniya berxwedana Qereqozaqê de cih digirin li ser 8’ê Adarê nêrînên xwe ji ANF’ê re anîn ziman.
Şervana YPJ’ê Rojbîn Ereb 8’ê Adarê li hemû jinan pîroz kir. Rojbîn Ereb girêdayî berxwedana li herêmê wiha got: “Berxwedana ku ji 8’ê Çileyê heta van kêliyan ji hêla gelê herêmê û şervanan tê meşandin, êrîşên dijmin û dagirkeriyê vala derxistiye.”
Rojbîn Ereb diyar kir ku her çiqasî ji hêla çeteyan û dewleta Tirk ve, herêm rojane bi dijwarî tê bombebarankirin jî berxwedana gel a dîrokî bê navber didome.
Rojbîn Ereb peyama xwe ya ji bo 8’ê Adarê wiha anî ziman: “8’ê Adarê li tevahî jinên kedkar ên cîhanê pîroz dikim. Divê ev roj ji bo her jinekê bibe roja azadiyê. Rêhevalên me û gelê me yên ku di êniya berxwedanê de cihê xwe digirin, ez vê rojê li wan jî pîroz dikim.”
Şervana YPJ’ê Ronahî Çiya jî diyar kir ku ruxmî êrîşên giran ên çeteyan jî, her kêlî di nav berxwedanê de ne û wiha got: “Em ji îdeolojiya xwe bawer in û ji gelê xwe bawer in. Ev şerê ku tê meşandin Şerê Gel ê Şoreşgerî ye. Ev yek di berxwedaniya ku li Bendava Tişrînê bi pêşengtiya gelê me tê raberkirin. Ruxmî ku di encama topbarana rasterast a li ser gel, heya niha bi dehan şehîd û birîndar çêbûne jî, lê gelê me jî bi awayeke xurt têkodikoşin.”
Ronahî Çiya 8’ê Adarê li jinan û hevrêyên xwe yên têkoşînê pîroz kir û wiha domand: “Roja jinên kedkar ên cîhanê di serî de li tevahî jinan û rêhevalên xwe yên di êniyên şer de li ber xwe didin, pîroz dikim û serkeftinê dixwazim.”
