Em di roja 4’ê Nîsanê rojbûna Rêber Apo û damezrandina 12’emîn salvegera YPJ’ê de rastî 4 şervanên YPJ’ê hatin ku her çar xwişkên hev in. Dema ku me xwest em van şervanên xwedî rûmeta welatê xwe ne nas bikin, em fêrbûn ku xwişkek wan a din jî di nava refên YPJ’ê de ye, lê ew halê hazir ne bi wan re bû. 5 xwişkên xwedî dayikek serhildêr! Navê wan 5 xwişkên têkoşer wiha ne; Rengîn Botan, Stêrk Kobanê, Roj Xabûr, Rûken Kobanê û Arîn Kobanê.
Her 5 xwişkên ku beşdarî nav refen YPJ’ê bûne, ji bajarê remza berxwedaniyê Kobanê ne. Berxwedana Kobanê hişt ku rola YPJ’ê li cîhanê deng vede. Ji bo ku berxwedana Kobanê ya rûmetê ser bikeve, li her çar parçeyên Kurdistanê gelê Kurd, jinên Kurd berê xwe didin Kobanê. Ji bo ku Kobanê nekeve ne tenê 4 parçeyên Kurdistanê di tevahî cihanê de jinên têkoşer, mirovên azadîxwaz berê xwe dan dergeha Arîn Mîrkanan. Dilê Kurdistanê û hemû cihanê di pêşengiya YPJ’ê de li Kobanê lê dida. Bajarê Kobanê bi xwe ji bajarekî ku Rêber Apo bi sala kar û xebat tê de daye meşandin. Ji bo vê yekê gelê Kobanê gelekî zana û girêdayî doza azadiyê ne. Îro ji gelek dayikên Kobanê keç û xortên xwe yên herî xweşik diyarî felsefe û doza Rêber Apo dikin.
‘EM ROJBÛNA XWE DI ROJBÛNA RÊBER APO DE DIBÎNIN’
Ji 5 xwişkên ku ji Kobanê tevlî YPJ’ê bûne, destpêkê bi kêfxweşiya xwe ya ku bi xwişkên xwe re bûyina hevrê dozê parve dike. Yek ji wan xwişkan jî Rengîn Botan ji me re diyar kir ku herî zêde jin rastiya hebûna xwe di nav YPJ’ê de dibîne û wiha nirxandinên xwe yê ji bo wateya rojê anî ziman: “Em 4’ê Nîsanê rojbûna Rêber Apo û damezrandina artêşa xwe ya YPJ’ê li hemû jinên azadîxwaz pîroz dikin. Me wek jin bawer nedikir ku rojekê kombûnekî weke YPJ’ê ji hemû netew û baweriyan jinan di nava xwe de bihewine, çêbibe, lê bi keda Rêber Apo û têkoşîna bi hezaran şehîdan re YPJ’ê xeyal û hêviyên me veguherand rastiyê. Ji ber di YPJ’ê de jin dibe ‘xwebûn’ ji hemû netew û baweriyan jin berê xwe didin nava refên YPJ’ê. Em weke 4 xwişk ango 4 hevrê îro vê roja bi wate bi hevdû re pîroz dikin. Em rojbûna xwe di rojbûna Rêber Apo de dibînin. Em şopdarên fikir û ramanê Rêber Apo û parêzvanên vê axê ne. Em bi hevdû re vê rojê pîrozkirinê serfirazin.”
‘EM JI SEKNA HEVRÊYÊN JIN BI BANDOR BÛN’
Şervanan wiha behsa sedem û bandorbûna tevlîbûna YPJ’ê dikin, “Li ser tevlîbûna me di qada şer û jiyanê de sekna hevalên jin bandoriyek mezin da çêkirin. Em bi axaftinên hevalê jin fikrê wan ê di derheqê jin de û sekna wan a axa xwe ve girêdayî bandor bûn. Ji xwe em her 5 xwişk li pey hev tevlî nava refên YPJ’ê bûn. Ji ber em bi tevlîbûna hevdû jî bandorbûn.”
‘JIN BI HÊZA XWE JIYANA AZAD DIAFIRÎNE’
Her 4 şervanên ku xwişkên hev in, di dawiyê de ev peyam dan: “ Pêwîste jin di her alî de xwe pêş bixe. Ji ber ku êrîşên pir dijwar li ser jinan hene. Li gorî wê rastiyê xwe rêxistin kirin û zanekirin pir girînge û di heman demê de li dijî van êrîşan têkoşînekê hevkar û hevpar pêwîste bê meşandin. Jin bi hêza xwe jiyana azad diafirine. YPJ pêşengiya vê jiyanê dike. Weke her 5 xwişk bi hemû hêz û coşa xwe em ê di nava artêşa xwe de ji bo azadiya xwe û civaka xwe, têkoşîna xwe mezintir bikin.”
