Heyeta DEM Partiyê ya ji Serokwekîlên Koma DEM Partiyê Gulistan Kiliç Koçyîgît, Sezaî Temellî û Ozturk Turkdogan bi Wezîrê Edaletê Yilmaz Tûnç re hevdîtin kir. Piştî hevdîtinê Gulistan Kiliç Koçyîgît bi navê heyetê daxuyaniyek da û anî ziman ku wan di hevdîtinê de beriya her tiştî gotine, divê şert û mercên Rêber Apo bêne sererastkirin, rewşa girtiyên nexweş, avaniya desteya çavdêriyê ya îdareyê û paketa dadgeriyê nirxandine.
Serokwekîlê Koma DEM Partiyê Sezaî Temellî hevdîtin nirxand û anî ziman ku ev hevdîtin wê dewam bikin û bi giştî atmosfereke erênî heye.
‘ME ŞERT Û MERCÊN ABDULLAH OCALAN RAGIHAND’
Serokwekîlê Koma DEM Partiyê Sezaî Temellî diyar kir ku hevdîtina bi Wezîrê Edaletê re erênî derbas bû û got, “Hevdîtin beriya her tiştî erênî derbas bû û hevdîtineke girîng bû. Bêguman me zanin ku mesele hemû tenê bi hevdîtinekê nikarin bêne çareserkirin. Piştre jî wê hevdîtin hebin. Lê belê ji bo me mijarên sereke hebûn. Me dixwest van mijarên girîng tavilê ragihînin, ji ber ku amadekarî ji paketeke dadgeriyê re tê kirin. Me dixwest, paketa dadgeriyê van meseleyan li ber çavan bigire. Lewma jî hevdîtinek baş bû.
Lê belê ji bo me rojeva nayê guhertin ew e ku şert û mercên kar û jiyanê yên Birêz Ocalan bêne sererastkirin. Bi taybetî di vê demê de ku ewqasî bi xurtî dest li siyasetê werdide û bi helwesta xwe herikîna dîrokê diguherîne, ne ya qebûlkirinê ye ku şert û mercên wî yên kar û jiyanê kêm bin. Me daxwaza xwe ya ji bo sererastkirina vê mijarê ragihand.
Wan bi xwe jî ji me re qala wê yekê kir ku Wezareta Edaletê di nava mezûata heyî ya qanûnî de dikare çi bikin. Lê belê anîn ziman ku guhertina mewzûatê ne karê wezaretê ye, mijareke ku bi meclîsê re eleqedar e, lewma ji bo Meclîs guhertineke nû ya qanûnî bike û pirsgirêkên ji ber qanûnên heyî çareser bike, wê van hemûyan pêk bînin.”
‘EM HÊVÎ DIKIN KU WÊ PAKETA DADGERIYÊ JI NÛ VE AMADE BIKIN’
Temellî têkildarî paketa nû dadgeriyê ku DEM Partî jî di nav de gelek derdor rexneyan ê dike nirxandineke bi vî rengî kir: “Mijarên girtiyên nexweş, sererastkirina înfazê, saziya çavdêriyê ya îdareyê, cezayên dîsîplînê û doza Kobanê jî di nav de me gelek mijar anîn ziman. Ev hemû not kirin. Me israr kir ku paketa dadgeriyê bi van hesasiyetan bê amadekirin. Wan bi xwe anîn ziman ku di vê mijarê de bixebitin, ya ku ji raya giştî re hatiye ragihandin têrê nake, paket wê dewam bike û li ser van hemû pirsgirêkan dixebitin. Hinekî ji me re ragihandin, lê belê me jî gotin ev hemû wê têrê nekin. Li ser pirsa ’em çi dikarin bikin’ ku bersivê bide bendewariya raya giştî û civakê, nîqaş hatin kirin. Bêguman di demeke bi vî rengî ya siyasî de, di demekê de ku dadgerî ewçend bi roleke girîng radibe, divê gavên hîn bi biryar û wêrekî bêne avêtin. Gotin wê li ber çavan bigirin û sererastkirinê jî di vê çarçoveyê de binirxînin. Vê yekê em kêfxweş kir.”
