25 sal in Rêberê Gelê Kurd Abdullah Ocalan li Îmraliyê girtî ye, nêzî 3 sal in ti agahî jê nayê girtin. Mafê hevdîtina bi malpat û parêzeran re bi temamî jê hatiye standin. Ji bo şikandina vê tecrîda li ser Abdullah Ocalan 10’ê Cotmehê li 74 navendên cîhanê daxuyanî hatin dayîn û bi vî rengî pêngava “Ji Ocalan re azadî, ji pirsgirêka Kurd re çareserî” destpê kir.
Li dijî vê tecrîda li ser Abdullah Ocalan CPT û saziyên navneteweyî hîn jî bêdeng in. Piştgiriya ji pêngava “Ji Ocalan re azadî, ji pirsgirêka Kurd re çareseriya siyasî” jî zêde dibe.
Berdevkê Têkîliyên Navneteweyî yê partiya Eûskal Herrîa Bîldû ku partiya koalîsyonê ya herî mezin a welatê Baskê ye, Igor Zûlaîka têkildarî tecrîda li ser Abdullah Ocalan û pêngava 10’ê Cotmehê ji ANF’ê re axivî.
‘TECRÎD FIKARÊ DIDE MIROV’
Zûlaîka anî ziman ku tecrîda Îmraliyê fikarê dide mirov û ev yek nayê qebûlkirin û got ku divê rêberê dîrokî yê gelê Kurd Abdullah Ocalan azad bibe. Zûlaîka got: “Azadiya Abdullah Ocalan ji me Baskiyan girîng e; ji ber ku Ocalan rêberê gelê Kurd e.”
Siyasetmedarê Baskî Zûlaîka bal kişand ser rolê Abdullah Ocalan ê di çareseriya pirsgirêka Kurd de û got: “Azadiya Ocalan hem ji bo çareseriya pirsgirêka Kurd û hem jî aştiya di navbera Tirkiye û Kurdan de girîng e. Weke rêberê dîrokî yê gelê Kurd Abdullah Ocalan xwedî pozîsyona çareserkirina pirsgirêka Kurd e. Ji bo dawî li şer were, pêdivî bi çareseriyeke demokratîk heye.”
‘DIVÊ DAWÎ LI TECRÎDÊ WERE Û ABDULLAH OCALAN AZAD BIBE’
Zûlaîka bang li dewleta Tirk kir ku tecrîda li ser Abdullah Ocalan rake û azadiya wî mîsoger bike û got: “Piştgiriya ji pêngava 10’ê Cotmehê re girîng e. Pêngaveke bi vî rengî li ji bo azadiya girtiyên siyasî yên Baskî, li welatê Baskê jî heye. Di pêngava ji Abdullah Ocalan re Azadî de cih girtin, ji bo me rêbazeke ku em piştgiriya xwe ya ji Kurdan re bînin ziman.”
