Girseya gel a ku tevlî pîrozbahiya li Qamişloyê bû salvegera Şoreşa 19’ê Tîrmehê silav kir. Di pîrozbahiyê de hate ragihandin ku şoreş ne tenê ji bo Rojava her wiha ji bo gelên Rojhilata Navîn gaveke dîrokî bû.
Ji rêveberên Saziya Malbatên Şehîdan a Tirbespiyê Xerma Elî ji ANF’ê re axivî û anî ziman ku Şoreşa 19’ê Tîrmehê diyarî Rêber Apo, şehîdên şoreşê û gel hatiye kirin û got, “Îro ji bo me rojeke gelekî taybet û bi wate ye. Hêviya me ya herî mezin ew e ku çar parçeyên Kurdistanê azad bibe û her roj ji bo gelê me weke cejnê be.”
Hevserokê Meclîsa Rêveber a Rêveberiya Xweseriya Demokratîk a Kantona Cizîrê Hesen Şero jî anî ziman ku Şoreşa 19’ê Tîrmehê şoreke ji berxwedaneke mezin a bi berdêlên giran ên gel e û got, “Ev şoreş ji bo avakirina Sûriyeyeke demokratîk gaveke bingehîn e. 19’ê Tîrmehê ne tenê ji bo gelê Rojava her wiha ji bo gelên Bakur û Rojhilatê Sûriyeyê hemûyan bûye xaleke dîrokî. Îro li Rojhilata Navîn veguherî mînaka herî girîng a modela neteweya demokratîk.”
Hesen Şero bi taybetî bal kişand ser bûyerên dema awî yên li Suwêdayê û destnîşan kir ku çareserî xwişk û biratiya gelan, jiyana bi hev re ye. Şero got, “Divê gelê Sûriyeyê bi hev re sîstema xwe ava bike, bi nasname, bawerî û dengê xwe tê de cih bigire. Îro sîstema li Bakur û Rojhilatê Sûriyeyê hatiye avakirin, mînaka vê jiyana hevpar e. Hemû gel vê rojê bi coş pîroz dikin.”
Endama Meclîsa Jinan a Saziya Malbatên Şehîdan Cewher Osman diyar kir ku şoreş bi pêşengiya jin û ciwanan hate meşandin û got, “Şoreşa 19’ê Tîrmehê bi pêşengiya gelê Kurd destpê kir, lê di demeke kurt de veguherî şoreşa hevpar a gelên herêmê. Jinan pêşengî ji vê şoreşê re kirin û ciwan jî bêteredût beşdarî nava refên têkoşînê bûn.”
Cewher Osman ragihand ku li hemberî krîza li Rojhilata Navîn gelekî bi wate ye ku Şoreşa Rojava deng vedide û got, îro li başûrê Sûriyeyê berxwedana li Suwêdayê jî bi vî ruhî dewam dike. Cewher Osman got, “Bûyerên ku îro diqewimin li dijî hêzên tarî bi fedakariyeke mezin a zarokên me dewam dike. Ji ber vê yekê em Şoreşa 19’ê Tîrmehê weke projeyeke dîrokî dibînin û bi vî ruhî têkoşîna xwe dewam dikin.”
