Koma Amed bi tevkariya Şaredariya Bajarê Mezin a Amedê amadekariyê dike ku piştî 27 salan li Amedê konserê bide. Komê ku piştî salên dû rû dirêj mehên derbasbûyî li Ewropayê konser da beriya çend rojan bi daxuyaniyekê diyar kir ku wê 25’ê Cotmehê li Amedê konserê bide. Konsera ku bû sedema kelecaneke mezin, bendewarî xist nava bi milyonan mirovî. Konser wê li qada Newrozê bê pere bê dayin. Endamê komê Suleyman Çarnewa kelecana xwe ya ji bo konserê parve kir û got, “Ev yek ji bo me ji konserê wêdetir e, dewama çîroka me ya nîvcomayî ye.”
Koma ku ji ber stranên xwe neçar ma sirgûn bibe, konsera xwe ya dawî ya li Amedê li gel hin endamên xwe yên li Tirkiyeyê man di sala 2001’ê de di pîrozbahiyên Newrozê de da. Kom bi kelecan li benda 25’ê Cotmehê ye ku konserê careke din bide. Suleyman Çarnewa anî ziman ku stranên wan qet nehatine jibîrkirin, nifşên nû xwedî li wan derdikevin û li ser konserê axivî.
‘JI BO ME TEMAMKIRINA ÇÎROKEKE NÎVCOMAYÎ YE’
Çarnewa got, “Dibe ku em vê kelecana xwe paşerojê bi stranekê bînin ziman. Gelek caran di xewna xwe de me li kolanên Amedê stran digot. Hîn jî bawer nakim ku em ê konserê bidin. Ji bo me weke xewnekê ye. Di dema konserê de em ê bibînin ku ev rastî ye. Ev yek ji bo me ji konserê wêdetir temamkirina çîroka me ya nîvcomayî ye. Çûyîna Amedê ku me xeyala wê jî ji bîr kiribû, bû hesreteke mezin di dilê me de. Em ê bi coşa vê hesretê bistirên. Dilê me li benda wê rojê ye.”
Çarnewa bi dewamî got, “Deynekî gelê Amedê li me heye. Weke Koma Amed ji ber sedemên ne di destê me de bû, me nekarî bi hemû endamên kona xwe konserekê bidin. Di vir de em li ber xwe dikevin. Guhdarên me stranên Koma Amed timî parastin. 25’ê Cotmehê berf jî bidê, bahoz jî rabe em dixwazin vê coşê bi gelê xwe re parve bikin.”
‘HERÎ ZÊDE DIVÊ HUNERMEND DAXWAZA AŞTIYÊ BIKIN’
Çarnewa bal kişand ser pêvajoya diyalogê û got, “Di salên 1990’î de ciwanekî ku dihat konserê me, niha nêzî pêncî bûye. Yanî di vê pêvajoyê de emrê xwe di şer de derbas kiriye. Ji ber vê pirsgirêkê bi milyonan mirov neçar man li sirgûnê bimînin. Ji ber vê jî herî zêde em hunermend divê ji bo aştiyê, ji bo azadiyê hewl bidin. Dengê huner û hunermendan tenê di nava aştiyê de dikare bilind bibe. Aştî, azadî û demokrasî ji bo me deyn e. Bi vê konsera xwe re em dixwazin li Amedê li gel milyonan mirovî daxwaza aştiyê bikin.”
LI SER KOMA AMED
Kom di sala 1988’an de li Fakulteyên Tipê yên Enqere û Hacettepeyê ji aliyê xwendekaran ve ava bû. Endamên destpêkê yên komê Evdilmelîk Şêxbekir, Gulşen Çetîn, Savaş Çakmak, Rohat Kûtlay, Fîkrî Kûtlay, Mûstafa Kart û Ahmet Kaya bûn. Albûma xwe ya destpêkê jî sala 1990’î bi navê ‘Kulîlka Azadî’ weşand. Ablûmê deng veda. Yek ji endamên destpêkê yên komê Evdilmelîk Şêxbekir tevkariyeke mezin li danîna hîmên bingehîn ên Navenda Çanda Mezopotamyayê kir. Di Îlona 1991’ê de tevlî nava refên gerîla bû, di sala 1992’an de şehîd bû. Komê bi beşdariya gelek hunermendên din karê xwe dewam kir. Hin endamên komê piştî albûma ‘Dergûş’ a sala 1997’an hate weşandin, ji ber sedemên siyasî neçar man li welatên Ewropayê serlêdana penaberiyê bikin.
Albûmên komê:
Kulîlka Azadî (1990)
Agir û Mirov (1995)
Dergûş (1997)
