Li Amedê jineke din hate qetilkirin. Şeva 26’ê Tebaxê zilamê bi navê Ersan Akdemîr Sûltan Kara 32 salî ya di pêvajoya hevberdanê de bi çekê qetil kir. Sûltan Kara ya 4 salan beriya niha zewicî, du mehan beriya niha ji bo berdanê daxwaznameya cudabûnê amade kiribû. Xwişka jina hatî qetilkirin a bi navê Şehrîban Kara diyar kir ku gefên tundî û kuştinê bi awayekî sîstematîk li xwişka wê dihatin xwarin û xwest ku kujer tavilê were girtin.
Şehrîban Kara têkildarî bûyerê axivî û qetilkirina xwişka xwe bi gotinên ‘’Tu kesî tiştek nekir’’ pênase kir. Şehrîban Kara diyar kir ku kujerî di zewaca xwe ya beriya niha de jî heman tişt kirine û got: ‘’Xwişka min mir û dilê me hemûyan pê dişewite. Dewlet tiştekî nake. Ev 4 sal bûn zewicî bû û her roj digot ku ‘wê min bikuje.’ Du caran ji bo mirinê lê xistibû. Gef lê dixwarin. Dema ku ducanî jî bû hewl dabû ku wê bikuje.’’
HER ROJ GEF DIXWARIN
Şehrîban Kara piştre diyar kir ku malbata wî ji bo ku gilîdar nebe gef li wê dixwar û ev yek anîn ziman: ‘’Beriya du mehan daxwazname dabû. Digot ku ‘ji bo ku ez ji wî rizgar bûm ez gelekî kêfxweş im.’ Li gel daxwaznameya berdanê daxwaza jêdûrxistinê jî kiribû. Piştî biryara berdanê failî gefên kuştinê dixwarin. Xwişka min hate qetilkirin lê belê ew zilam li derve bi rehetî digere. Jin tên qetilkirin lê belê tu kes li ser vê yekê nasekine. Ez daxwaza edaletê dikim, êdî bes e!’’
