Ji roja Pêncşemê û vir ve li bajarên peravê rojavayê Sûriyeyê bi sedan sivîlên Elewî, ji aliyê komên çekdar ên girêdayî HTŞ’ê ve hatin qetilkirin. Li dijî komkujiya Elewiyan nerazîbûn zêde dibin. Tevgera Azadiya Jinên Êzidî (TAJÊ) jî bi daxuyaniyeke nivîskî nerazîbûn nîşan da û banga xwedîderketinê kir.
TAJÊ, diyar kir ku li Sûriyeyê gelek pêkhate, bawerî û neteweyên cuda têde dijîn û ev tişt hat gotin: “Rêjîma Sûriyeyê ya Baas heta kêliya hilweşandinê jî bi siyaseta înkarê nêz bû û mafê gel û baweriyên cuda nasnekir. Di şerê 14 salan de gelên li Sûriyeyê êşên mezin dîtin û bi wêrankirin û komkujiyên herî giran re rû bi rû man. Ev şer û kiryarên qirker heta roja îro hîn bi awayekî hovane kûrtir bûne.
Komkujiyên ku îro li dijî civaka Elewî têne kirin berdewama heman zihniyetê ye. Di Kanûna 2024’an de bi hilweşandina rejîma Baas re HTŞ’ê desthilata xwe li Şamê ragihand. Bi vê guhertina desthilatê re herêmên di bin desthilata rejîma Esed de bûn di nava çend rojan de bi temamî ketin bin kontrola HTŞ’ê de. Bi guhertina rejîmê re gelên Sûriyeyê bi hêviya ku wê şer bi dawî bibe kêyfxweşiya xwe anîn ziman. Lê ji ber hatina hêzekî mîna HTŞ’ê ya li ser desthilatê di gelên Sûriyeyê de bi xwe re metirsî û fikarên cidî jî anî. Komkujiya li dijî civaka Elewî carekî din ew metirsî û fikaran piştrast kir.”
TAJÊ, ragihand ku çawa çeteyên DAÎŞ’ê di 3’yê Tebaxa 2014’an de li dijî civaka Êzidî bi taybetî jinên Êzidî qetlîaman pêk aniye, niha heman tişt li ser civaka Elewî tê kirin û ev tişt hat gotin, “Ev komkujî bi tu awayî nayê qebûlkirin. Ev kiryarên têne kirin kiryarên çeteyên DAÎŞ’ê ne. Weke civaka Êzidî û taybet jinên Êzidî em êşa bi destê hêzên cîhadîst ku qaşo li ser navê Îslamê bi civaka Elewî didin jiyîn ji kûrahî de hîs dikin.
Li ser vê bingehê em di serî de bang li civaka xwe, hemû jin, civak, bawerî û gelên azadîxwaz dikin ku li dijî vê komkujiya tê kirin dengê xwe bilind bikin.”
