Parlamenterê DEM Partiyê Kamûran Tanhan got, “Em li ber aştiyeke mezin e’ û anî ziman ku ev pêvajo ne tenê bi bêdengkirina çekan, di heman demê de bi veguherîna ziman, hiqûq û siyasetê dikare bê meşandin.
Tanhan ji ANF’ê re axivî û bal kişand ser wê yekê ku divê hikumet û medya wê bi zimanekî nû yê li gorî pêvajoyê biaxivin. Tanhan destnîşan kir ku di pêvajoyê bi vî rengî de divê danûstandin ji aliyê lîderên xurt ve bêne meşandin û aştî hem di gotinê de hem jî di pratîkê de bi şênberî û samîmî were nîşandan.
Tanhan got, “Dewlet û hikumet dema ku nêzî pêvajoyê bû, ya ku destpêkê divê bikin, teqez cidiyet e.”
Kamûran Tanhan rexne li hikumetê kir ku pênaseyeke şênber li pêvajoyê nekiriye û got, “Hîn di qonaxa amadekariyê ya danûstandinan de dikarîbû bi navekî cuda pêvajo bihata pênasekirin. Gotinên têne bikaranîn ne tenê pêvajoyê bi xwe, her wiha sekn û nêta aktorên di nava pêvajoyê de ne jî nîşan didin. Lewma hin pênaseyên şaş an jî kêm, carna ewqasî bi bandor dibin ku dikarin tesîrê li çarenûsa pêvajoyê bikin. Lewma gelek sedem hene ku mirov dikare bibêje desthilatdarî û dewlet ji cidiyetê bêpar in.
Birêz Abdullah Ocalan dema beriya niha gotibû, ‘Pirsgirêk ne ji ber asta daxwazan e; pêwendiya pirsgirêkê bi rêbaza danûstandinê û nêzîkatiya durust heye’. Mezinahî û pêwîstiya biryarên herî giran ên weke fesixkirin û şewitandina çekan hîn jî ji aliyê desthilatdarî û dewletê ve nehatine fêhmkirin. Bersiva ku dan ‘mafê hêviyê’ weke mînaka vê yekê dikare bê nîşandan.”
‘PÊWÎSTÎ BI GAVÊN JI DIL Û ŞÊNBER HEYE’
Tanhan got, eger rayedarên dewletê li ser aştiyê hîn bêhtir biaxivin û kar bikin, ji bo aştiyê mîtîngan lidar bixin an jî kesayetên xurt li van deveran bêne dîtin wê tevkariyeke girîng bike û got, “Pirsgirêkeke din û ya herî girîng ew e ku rayedar têkildarî pêvajoyê gotina ‘terorê’ yan jî ‘Tirkiyeya bê teror’ bi kar tînin. Di danûstandinên bi vî rengî yên ji bo aştî û çareseriyê de, lihevkirina destpêkê li ser navê pêvajoyê ye. Gotina ‘Terorê’ ji her alî ve, bi taybetî jî ji aliyê nêt û cidiyetê ve gotina destpêkê ye ku divê bê terikandin.”
Parlamenterê DEM Partiyê Kamûran Tanhan hin pêşniyarên xwe bi vî rengî anî ser ziman:
* Guhertinên qanûnî û destûra bingehînî bi şênberî bêne diyarkirin.
* Bêçekbûyîn ne tenê ji bo avaniyên rêxistinbûyî be, her wiha bêçekbûna şexsî jî bê kirin; bi taybetî aqûbeta çekên ku piştî 15’ê Tîrmehê hatin belavkirin bê lêkolînkirin.
* Pêvajoya entegrasyonê bê destpêkirin û bi biryardarî bê meşandin.
* Ji bo pêvajoyê bi piştgiriya raya giştî bê meşandin piştgirî ji karên perwerde, medya û civaka sivîl re bê dayin.
* Ji bo aştiya civakî bernameyên başkirina travmayê bikevin meriyetê.
* Komîsyon û alî peyamên hevgirtî bidin ku baweriyê bidin raya giştî.
* Zimanê pêvajoyê hesas be, gotinên dervehiştinê yên weke ‘terorê’ neyên bikaranîn, li şûna wê zimanekî ku aştiyê dide pêş û li ser bingeha çareseriyê ye bê bikaranîn.
* Medya li şûna nêzîkatiyên krîmînalîzekirina pêvajoyê, zimanekî çêker û berpirsyarane bi kar bîne ku lihevkirina civakî xwedî dike.
