Di 20’ê Çileya 2018’an de dewleta Tirk û çeteyên wê êrîşên giran ên hewayî birin ser Efrînê û dest bi operasyona dagirkirinê kirin. Ji hewayî û bejahî ve bombardûmaneke giran kirin. Li pêşberî van êrîşan li ku pêş çavên cîhanê dihatin kirin, şervanên YPJ û YPG’ê bi wêrekî û ruhê fedaî li ber xwe dan û têkoşîneke destanî kirin. Gelê herêmê jî li gel şervanên xwe mil bi mil bi ruhê şerê gel ê şoreşgerî 58 rojan bê navber li ber xwe da.
Bîranînên vê berxwedanê bûn mijar ji pirtûkan re û derbasî nava rûpelên dîrokê bûn. Wê demê ji çar aliyên Rojava gel bi konvoyan berê xwe da Efrînê ji bo piştgiriyê bide şervan û gelê Efrînê. Efrîn bû yek ji navendên herî xurt ên yekîtiya gelan. Di dema vê berxwedanê de ji çar aliyên welêt û ji derveyî welêt bi sedan ciwan bûn leheng. Bi sedan şervan ji gelên cuda xwe gihandin Efrînê, tevlî têkoşînê bûn, xwişk û biratiya gelan temsîl kirin û gihîştin asta şehadetê.
Ji dema ku tovên Şoreşa Rojava li vê xakê reşiyan û vir ve şervanên YPJ û YPG’ê li pey soza pîroz sekinîn ku dan Rêber Apo, şehîdên doza azadiyê û gel û têkoşîna xwe bi vî rengî dewam dikin. Bi taybetî şervanên YPJ’ê di nava vê berxwedanê de li ser şopa Zîlan û Arîn tevlî eniyên parastinê bûn. Şervanên YPJ’ê ku ji çar aliyên cuda yên Kurdistanê û ji welatên cuda hatin, li refên herî pêş ên berxwedanê bi lehengî têkoşiyan û heta kêliya dawî şer kirin. Ji roja destpêkê ya berxwedanê heta niha şervanên YPJ’ê berdêlên gelekî giran dan.
ŞEHÎDÊN YPJ’Ê BÛN SEMBOLA TÊKOŞÎNA JINÊ
Di vê berxwedana bi heybet de Newal, Amara, Aljîn, Viyan, Zîn, Têkoşîn, Cûdî, Berfîn, Sara, Barîn, Amargî û gelek şervanên din ên fedaî ji bo têkoşîna azadiyê bi lehengî şer kirin û şehîd bûn. Bi heman rengî şervanên fedaî yên weke Avesta û Ekîn li dijî dagirkeran çalakiyên fedaî kirin û ji Berxwedana Serdemê bersiv dan dijmin. Li gelek qadên têkoşînê berxwedaneke mezin hate nîşandan. Hîn ji roja destpêkê ve hevrê şehîd bûn, gelek ji wan jî heta nefesa xwe ya dawî şer kirin. Bi sedan şervan birîndar bûn, gazî bûn lê belê li gel vê yekê jî dest ji parastina xaka xwe bernedan.
150 şehîdên YPJ’ê di oxira azadiyê de bi xwîna xwe ev berxwedan pêk anîn. Ew bûn sembola têkoşîna jinê ku jiyaneke bê welat û bê azadî qebûl nake. Ew bûn şervanên bi rûmet ên gelekî welê ku hîn jî bi hêviya vegera li welatê xwe têdikoşe.
Têkoşîna ku ji 18’ê Adara 2018’an û vir ve ji bo azadiya Efrînê tê kirin, bi berxwedana gelê me dewam dike. Wê rojê dibe ku Efrîn bi temamî ketibe bin dagirkeriya dewleta Tirk û çeteyên wê, lê belê ji wê rojê heta îro Berxwedana Serdemê di qonaxa duyemîn de dewam dike û her roj hîn xurt dibe. Şervanên YPJ, YPG û QSD’ê bi berxwedana xwe û têkoşîna bi biryar a gel nîşan dide ku rojên azad nêzîk e. Berxwedana ku îro bi taybetî li Bendava Tişrînê, Dêr Hafirê û Qereqozaxê tê meşandin, bi bawerî û hêviya gelê me ya ji azadiyê dewam dike. Bi têgihiştina xwedîderketina li mîrateya şehîdan em têkoşînê mezin dikin û gaveke din xwe nêzî azadiyê dikin.
