Berxwedana li Bendava Tişrînê ya li dijî êrîşên dewleta Tirk û çeteyên wê, didome. Bi sedan kes ji bo beşdarî berxwedanê bibin, duh ji Kantona Firatê çûbûn bendavê û çalakiya nobeta berxwedanê dewir girtin.
Berxwedana Bendava Tişrînê bû wesîle ku bi hezaran çîrok di dilê gel de deng vede. Her yek ji wan dengekî cuda yê fedekariyê, cesaret û berxwedanê ye. Bendava Tişrînê ne tenê cihê têkoşîn û berxwedanê ye, yek ji destanên ku di dilê gelan de hatiye xemilandin e. Her kes parek ji vê çîrokê hilgirtiye. Hin ji wan zemîna civakî xurt dikin hin ji wan jî li qadên herî dijwar têkoşîn û şerê vê dimeşînin… Lê hemû parçeyên heman dil in, heman têkoşînê ne… Û hemû lehengên çîroka mezin in ku dê rojekê deriyê azadiyê vekin.
Mehmûd Mihemed Elî yê 85 salî ku bajarê Çelebiyê ya Kobanê tevlî çalakiyê nobetê bûye dibêje, “Temen û gopal li pêşiya berxwedanê ne asteng e. Em ê her li vir bin. Ev çar car in ez têm bendavê. Ev der welatê me û hebûna me ye, em ê xwedî lê derkevin. Em ê heta nefesa xwe ya dawî ji bo siberoja zarokên xwe li ber xwe bidin. Ev der warê me ye, em ê dest jê bernedin.”
Mehmûd Mihemed wiha lê zêde dike, “Dagirker êrîş bikin jî em li vir in. Ev axa me ye, em ê av û elektrîka xwe biparêzin. Ez ê heta dawiyê bi malbata xwe re li vir bim.”
Kalemêrê bi navê Mistefa yê ji Kobanê jî, bi heman biryardariyê axivî û wiha got, “Em xwedî li mîrateya şehîdên xwe derdikevin. Serketin ya me ye û em ê berxwedana xwe xurtir bikin. Heta dawiyê em ê li vir bin.”
Ciwan, kal, jin… Hemû jî bi heman biryardariyê li ber xwe didin. Berxwedan di her dilek de, gav bi gav mezin dibe. Û her kes sond dixwe ku heta bibin parçeyek ji vê serketinê dê li vir bimînin.
