Bi wesîleya salvegera 88’an a Terteleya Dersimê li bajarê Basel ê Swîsreyê çalakiyeke bîranînê hate lidarxistin. Federasyona Elewiyan a Demokratîk (FEDA), Kongreya Avakirinê ya Dersimê (DÎK) û Navenda Civaka Demokratîk a Kurd li Baselê (NCDK) çalakî lidar xistin.
Çalakiya ku li salona konferansê ya NCDK’ê hate lidarxistin, bi deqeyeke rêzgirtinê destpê kir. Piştre jî Pîr Alî Matûr çerax pêxist û beşdar axivîn, peyam dan.
Berdevka FEDA’yê ya Swîsreyê Songul Çelîk bal kişand ser polîtîkaya komkujiyê ya dewleta Tirk a li ser Elewiyan, Kurdan, Ermenan û hemû nasnameyên cuda û got, “Ji bo aştiyê pêwîstî bi berdêlê heye. Hîn doh me Sirri Sureyya ji dest da. Em li pêşberî bîranîna wî bejna xwe ditewînin. Em canên xwe yên li Dersimê hatin qetilkirin bi hezkirin û minet bi bîr tînin.”
Endama Yekîtiya Jinên Kurd a li Swîsreyê (YJK-S) Ozen Aytaç jî Sirri Sureyya Onder bi bîr anî û got, “Em ê armanca aştiyê ya ku wî ji me re hişt teqez bi ser bixînin.”
Ji DÎK’ê Huseyîn Berkan Alper jî diyar kir ku qirkirin hîn dewam dike û banga xwedîderketina li Dersimê kir.
Di bîranînê de sînevîzyon hate nîşandan û bi parvekirina pariyan bi dawî bû.
