TEV-ÇAND û Hunera Mizgîn bi wesîleya salvegera wefata hunermendê mezin Aram Tîgran daxuyaniya nivîskî weşandin. Daxuyanî bi vî rengî ye:
“Rêber Apo bêyî ku hunermendê mezin Aramê Tîgran nas bike bi gotina “Ev deng divê nemire, divê her bijî” wî pênase kir. Hunermendê mezin Aramê Tîgran di 8’ê Tebaxa 2009’an de xatir ji jiyanê xwest.
‘ARAM DÎKRAN PIRA DI NAVBERA ERMEN Û KURDAN DE BÛ’
Aram Tîgran bi her awayî xwedî cihekî taybet bû. Bi hunera xwe ya resen, bi helwesta xwe ya dostane, bi Ermenîbûn û Kurdistanîbûna xwe. Gotin û awazê ku hildibijartin, ji hestên gel bûn, pir zû strana wî dikarîbû li ser her zimanî bigere û di dilê her kesî de cih bigre. Kêm hunermend hene ku mirov kare bi saetan bêyî ku aciz bibe guhdar bike. Ew yek ji wan bû. Guh neda êrîşên hin derdoran ku ji ber bi Kurdî distrê, ew rexne dikirin. Berevajî wê yekê, wî riya dostanî û hevjiyanê hilbijart, parast û heya roja dawî wek xwe ma. Ew ne tenê bi stranên xwe, bi helwest û jiyana xwe jî weke pireke dostanî û hevjiyanê di navbera gelê Kurd û Ermen de bû.
‘TIMÎ BEHSA HEVJIYANA AZAD DIKIR’
Bi vê helwesta xwe ku digot: “Ez ê hemû çekan bişewtînim û wan bikim Tenbûr û Cumbuş” bi xwe behsa vê rojê dikir, behsa hevjiyana azad û civaka demokratik ku Rêber Apo û tevgera azadiyê destpê kiriye dikir.
Aram Tîgran di jiyana xwe de bi sedan stran gotin, her çiqasî bi Erebî, Ermenî, Suryanî û Yewnanî stra jî. Ji Qamişlo li dawet û şahiyan, heya bi radyoya Êrîvanê, heya bi şahî û pîrozbahiyên Kurdan li Ewropayê bi stranên Kurdî hate naskirin.
Di salên dawî de vegeriya Kurdistanê, Amedê ya her hesreta wî bû. Lê ji ber nexweşiya xwe vegeriya Yewnanistanê û her wesyetiya wî ew bû ku wî li Amedê veşêrin. Lê dewleta ku dapîr û kalên Aram di komkujiyan re derbaskiribû, nehişt ku cenazeyê wî derbasî warê kalên wî bibe.
‘EM Ê DENGÊ ARAM DÎKRAN BÊMIRIN BIHÊLIN’
Rêber Apo li ser wefata Aram ev tişt anîbû ziman: “Dengê Aram Tîgran dengeki tije û xemgîn bû, Wî dengî ez birim Kurdistanê. Ev deng nemire. Ez ji bo Aram nabêjim miriye, ew şehîd e, bêmirin e, şehideki mezin e, ji bo min nemiriye.” Wate û girîngiya Aram Tîgran vekirî û bêguman dike.
Em wek tevgera çanda demokratîk TEV-ÇAND û Hunera Mizgîn bi pênasiya Rêber Apo xwe erkdar dibînin ku hem wê dostaniyê, hem jî wî dengî bêmirin bihêlin.
