Tevgera Ekolojiyê ya Mezopotamyayê têkildarî banga “Aştî û Civaka Demokratîk” a Rêberê Gelê Kurd Abdullah Ocalan ku di 27’ê Sibatê de hate aşkerakirin, daxuyaniyeke nivîskî weşand. Di daxuyaniyê de wêraniyên ekolojîk û civakî yên li Rojhilata Navîn û Cîhanê hatin bibîrxistin. Hat gotin ku zîhniyeta netewe dewletê ya yekperest sed sal in li Kurdistanê ser înkarkirina nasname, çand û zimanê Kurdî hatiye avakirin û wiha hate gotin: “Polîtîkayên şer ên li dijî têkoşîna hebûna ya gelê Kurd ji her alî ve didomin. Xaka Kurdan hate talan û wêrankirin, mafê bijartin û hilbijartinê ji dest hat girtin, hatin koçberkirin û li dijî Kurdan şerekî taybet di meriyetê de ye. Girtin, binçavkirin û zext û krîzên civakî her roj zêdetir dibin.”
Di berdewamê de ji bo banga dîrokî ya Abdullah Ocalan wiha hate gotin: “Ev bang, bangekî ji bo hemû gelan e. Di vê çarçoveyê de divê hemû derdorên civakî xwedî li aştiyê derkevin. Weke Tevgera Ekolojiyê ya Mezopotamyayê, em radigihînin ku dê li berpirsyartiya xwe ya civakî derkevin û xizmetê ji aştiya civakî re bikin. Li vê xaka ku di tevahiya dîrokê de şerên bixwîn lê hatin jiyîn, êdî pêdivî bi aştiyeke birûmet heye. Em ê vê pêvajoyê bişopînin û piştgiriyê didin. Aştî, ji bo civakeke ekolojîk ferz e. Bi vê wesîleyê, di serî kes û saziyên têkoşîna ekolojîk dimeşînin, em bang li tevahiya kesên dilê wan ji bo aştî, demokrasî, edaleta civakî, xwezaya azad û civaka azad lê dide dikin ku xwedî li vê pêvjajoyê derkevin û berpirsyartiya xwe ya dîrokî bi cih bînin.”
