Li gorî nûçeya Reutersê ku agahiyên xwe dispêre çar çavkaniyan, di 21’ê Mijdarê de axaftineke kurt bi telefonê hate kirin û agahiyên nû têkildarî vê axaftinê li çapemeniyê belav bû.
Li gorî çavkaniyan, Trump hefteyek dem da Maduro ku li gel malbata xwe Venezuelayê biterikîne û biçe kîjan welatê ku dixwaze.
Ev dem roja Înê bi dawî bû. Rêveberiya Trump piştî bi rojekê ragihand ku qada hewayî ya Venezuelayê ji aliyê DYE’yê ve hatiye girtin.
Li gorî Reutersê Nicolas Maduro anî ziman ku ew amade ye welêt biterikîne lê belê ev yek bi hin şertan ve girêdayî ye.
Maduro ji bo xwe û malbata xwe efûyeke tam xwest. Her wiha xwest, pêkanînên DYE’yê yên li ser Venezuelayê bêne rakirin û der barê wî de lêpirsînên li Dadgeha Ceza ya Navneteweyî bêne betalkirin.
Hate ragihandin ku Donald Trump di axaftina telefonê de ya 15 deqeyan dewam kir, piraniya daxwazên Maduro red kir.
Rêveberiya DYE’yê Nicolas Maduro weke serokdewletê rewa yê Venezuelayê nabîne. Hikumeta Trump Maduro weke qaçaxçiyê narkotîkê û lîderê rêxistina terorê pênase dike.
